செப்டம்பர், 11, 2001 சம்பவங்கள்- அமெரிக்க சதித்திட்டம்!

நேற்று செப்டம்பர் 11, அமெரிக்காவில் நியுயார்க் மாநிலத்தில் நியுயார்க் நகரில் இருந்த உலக வர்த்தக் மையத்தை தகர்த்த பொழுது, இறந்தவர்களுக்கு நினைவு அஞ்சலி செலுத்திய நாள்! உலகின் மறுபக்கமான இந்த அமெரிக்க கண்டம் என்றமட்டுமில்லாது, உலகில் உள்ள அனைத்து நாடுகளும் இந்த நினைவு நாளில், இந்த சம்பவங்களில் இறந்த மக்களை நினைத்து பார்த்து இரங்கல் தெரிவித்தது! இந்த கொடூர சம்பவத்தின் போது இறந்தவர்கள் வெறும் அமெரிக்க நாட்டவர் மட்டுமில்லை, மொத்தம் 115 மற்ற நாட்டை சேர்ந்தவர்களும் தான்! இதில் நம் இந்தியர் ஒருவரும் உண்டு, அது போல் இந்தியாவிலிருந்து வந்து அமெரிக்க குடியுரிமைப்பெற்ற நம் தமிழ் நெஞ்சங்களும் உண்டு! அவர்கள் அனைவருக்கும் முதலில் அஞ்சலி செலுத்தும் வகையில் இந்த பதிவை சமர்ப்பிக்கிறேன்!

இந்த செபடம்பர் 11,2001 சம்பவம், தீவிரவாதத்தின் உச்சமாய், அல்கொய்தா தீவிரவாதிகளால் திட்டமிட்டு செயல்படுத்த பட்ட ஒன்று என்று உலகிற்கு பறை சாற்றப்பட்டது. ஆனால் இந்த மொத்த சம்பவங்களும் அமெரிக்கா சதி திட்டமிட்டு, மிகவும் சரியான முறையில் நடந்தேறிய ஒன்று என்று இப்பொழுது புதிய தகவல்கள் வர ஆரம்பித்துள்ளன! அதுவும் இந்த சதி திட்டத்தின் நோக்கம், எண்ணெய் வளமிக்க வளைகுடா நாடுகளை ஆக்கிரமித்து, தன் ஆட்சி செலுத்தவே, இதை அமெரிக்க தொலை நோக்குத்திட்டத்துடன் செயல்படுத்தப்பட்ட ஒன்று என்றும், அது மட்டுமில்லாமல், மிகப்பெரிய காப்பு மேசடி ஊழல் செய்யவும், நிலுவையில் நிற்கும் முக்கியமான சில மோசடி வழக்குகளின் தாஸ்த்திவேஜாக்களை அழிக்கவும், அமெரிக்க அரசாங்கத்தில் செல்வாக்குடன் உள்ள ஒரு சில பேரால், இப்பொழுதைய அமெரிக்க அரசாங்கத்தில் உள்ள சில முக்கியமானவர்களுடன்,திட்டமிட்டு நடத்தப்பட்ட இந்த அதிரடி தாக்குதல், நம் தமிழ் படங்களில் அரசியல்வாதிகளால் தூண்டபட்டு அப்பாவி பொது மக்களை அழிக்கும் சம்பங்கள் போல! (குறிப்பாக ஷங்கரின், இந்தியன் படத்தை ஞாபகம் படுத்திக் கொள்ளுங்கள், அதாவது வேண்டுமென்றே முதலமைச்சர் கலவரைத்தை தூண்டிவிட்டு, அப்பாவி மாணவர், மற்றும் பொது மக்களை கொல்லும் காட்சியை மனதில் கொள்ளுங்கள்!) இப்பொழுது இணையத்திலே, இன்றைய தொழில்நுட்ப உதவியுடன் தயாரிக்கப்பட்ட ஒரு திரைப்படம் வலம் வந்து கொண்டிருக்கிறது! இணையத்திலேயே சஞ்சரிக்கும் என் நண்பர்களே, உங்களில் எத்தனை பேருக்கு இது பற்றி தெரிந்திருக்க வாய்ப்பு உண்டு என எனக்குத்தெரியாது! ஆனால் அதை பற்றி என்ன என்று விளக்கவே இந்தப் பதிவு!

"Loose Change" என்கிற டாக்குமெண்டரி படம், இணையத்திலேயே கிடைக்கக்கூடிய வீடியோ கிளிப்புகளை கொண்டு, நடந்த ஒவ்வொரு சம்பங்களின் பின்னனனியையும் ஆராய்ந்து, அலசி, நடக்கப்பட்ட அத்தனை சம்பங்களும் சதித்திட்டத்தின் கீழ் நடக்கப்பெற்ற ஒன்று என்று கூறுகிறது இந்த திரைப்படம்! இந்த படத்தை இயக்கியவர் 'டைலன் ஏவரி'( Dylan Avery) என்ற 22 வயது நிரம்பிய ஒரு மாணவர்! இந்தப்படம் நடந்த அத்தனைச் சம்பவங்களுக்கும் ஒரு மாற்று நோக்கத்தையும், சதியின் ஆழத்தையும் திறம்பட விளக்குகிறது! அதாவது நம் நாட்டிலே அமைக்கப்படும் விசாரணை கமிஷன்ங்கள் போல், இந்த 9/11 சம்பங்களை ஆராய்ந்து உண்மையை வெளிக்கொணற இங்கும் கமிஷன் ஒன்று அமைக்கப்பட்டது. ஆனால் அந்த கமிஷன் ஆராய்ந்து கண்டறியாத சில உண்மைகளை மாற்று விளக்கத்துடன் இது விளக்குகிறது! இந்த தாக்குதல், தீவிரவாதத் தால் உண்டான ஒன்றல்ல! இந்த தாக்குதலின் நோக்கமே வேறு என்றும், அதை மிக சாமர்த்தியமாக அமெரிக்க அரசாங்கம் நடத்தி முடித்திருக்கிறது என்று எடுத்துரைக்கிறது!

முதலில் என்னவோ டைலன் ஏவரி ஒரு ஃபிக்ஸன் படம் போல இந்த செப்டம்பர் 11 சம்பவங்களை கொண்டு படம் எடுக்க தீர்மானித்தார். ஆனால் உள்ளே தோண்டி தோண்டி அராய்ச்சி செய்ய இறங்கிய போது பல உண்மைகள் புலப்பட்டன. அதாவது இந்த சம்பங்களின் உள் நோக்கம் தீவிரவாதமில்லை! இது முழுதும் அமெரிக்க அராசாங்கத்தின் சதித்திட்டமே என்று! அதாவது எந்த காரணமின்றி எண்ணைய் வளம் கொண்ட அரபு நாடுகளான ஈராக் மீதோ, மற்ற நாடுகள் மீது போர் தொடுக்க முடியாது! சரியான, வலுவான காரணமின்றி அந்நாடுகள் மீது படையெடுக்க உலக நாடுகளின் ஆதரவு வேண்டுமென்றால் தம் நாட்டு மக்கள் சிலரைக் கொன்று தான் அக்காரியத்தை நிறைவேற்ற முடியும் என்ற திட்டமிட்ட சதியால் விளைந்தது தான் இந்த செப்டம்பர் 11ல் நடந்தேறிய நிகழ்ச்சிகள்! ஆனால் தம் நாட்டினரை மற்றும் பலி கொள்ளாமல், பல உலக நாட்டு குடிமகன்களையும் கொன்று குவித்து இக்காரியத்தை நிறைவேற்றி இருக்கிறது அமெரிக்கா என்று இத்திரைப்படம் அறைகூவல் விடுக்கிறது!

இப்படம் அந்த காலகட்டத்தில் அமெரிக்கா க்யூபா மீது போர் தொடுக்க கையாண்ட ராஜதந்திர சதி திட்டங்களை விளக்கும் ஆரம்பத்தோடு தொடர்கிறது! பிறகு ஏற்பட்ட தாக்குதல் சம்பவங்களை ஒவ்வொன்றாக ஆராய்கிறது. முதலில் அமெரிக்க ராணுவ தலைமை பீடமான பெண்டகனை தாக்கிய விமானத்தை ஆராய்ந்து, அது உண்மையிலேயே பயணிகள் சென்ற போயிங் விமானம் தானா, இல்லை அமெரிக்கா தன் மீது ஏவிக்கொண்ட ஏவுகனைகளா என்பதை ஆராய்கிறது! அதை விஞ்ஞான பூர்வமாகவும், சிதலமைடந்த விமான பாகங்கள் அனத்தும் போயிங் விமானத்துடன் ஒன்றாத தன்மையும் விளக்குகிறது. ஆக இது திட்ட மிட்ட சதியே என்று கூறுகிறது!

இரண்டாவதாக "World Trade Center" என்கிற உலக வர்த்தக மைய கட்டிடங்கள், விமானத் தாக்குதலால் எப்படி அடுக்கிவைத்த சீட்டு கட்டுகள் கீழ் (அவர்கள் சொல்லும் உதாரணம், அடுக்கி வைத்த 'பேன் கேக்' போல என்று) விழுவது போல் விழும், அதை முறையாக வெடி வைத்து தகர்க்காவிடில் என சர்ச்சையை கிளப்பி இருக்கிறது! இடிந்து விழுந்த WTC டவர்கள் 1, 2, மற்றும் 7 (இந்த WTC கட்டிட வளாகம் பற்றி என்னுடய முந்தைய பதிவான 'World Trade Center-சமீபத்தில் பார்த்த படங்கள்!' என்ற பதிவை படிக்கவும்!) ஆகியவை முறையாக இடித்து தள்ளிய நிகழ்ச்சி போல் தான் இருக்கிறதே தவிர, தீவிரவாதிகளால் ஓட்டி சென்ற விமானம் மோதி தீப்பிடித்ததால் அவைகள், வெப்பம் தாங்காமல் விழவில்லை என கர்ஜிக்கிறது! இந்த கட்டிடம் கட்டுவதற்கான பொருட்களுக்கு சான்று வழங்கிய தரகட்டுப்பாட்டு நிறுவனங்களை அதிலும் துணைக்கழைத்து, விஞ்ஞான, பொறியல் தொழில்நுட்ப காரணங்களோடு விளக்குகிறது( நான் பெரிய எண்ணைய் சுத்திகரிப்பு ஆலை கட்டுமான தொழில் துறையில் இருப்பதால், இந்த அமெரிக்காவில் இருக்கும் தரக்கட்டுபாட்டு நிறுவனங்களின் நிர்ணயம், அங்கீகாரம் பற்றி தெரியும். இது மிகவும் பிரசித்து பெற்ற ஒன்று, கட்டுமான பொருட்கள் தயாரிப்பாளர்கள், உலக அளவில் அனைவராலும் பின்பற்றி வரப்படுவது, உதாரணத்துக்கு ASTM, ASME, API, NIST, ISA போன்றவற்றின் தரக்கட்டுபாடுகளின் நெறிமுறைகள் தெரியவில்லை என்றால் நீங்கள் இந்த கட்டுமான பொறியல் துறையில் காலம் தள்ள முடியாது, ஆதாலால், இப்படம் எடுத்துரைக்கும் சில உண்மைகள் நம்ப மறுக்க இயலாது!)

அடுத்து யுனைட்டட் ஏர்லைன்ஸ் விமானம் 93 வின் விபத்து பற்றி கூறுகிறது!(இது பற்றி ஒரு ஆங்கில படமும் வந்துள்ளது, வேண்டுமானால் அப்படம் பார்க்கவும், இச்சம்பவம் அனைத்தும் நீங்கள் அழகாக திரைப்படத்தில் பார்க்கலாம்!) அந்த விமானம் 93வால் விபத்தே நிகழவில்லை என சாதிக்கிறது! இது அமெரிக்க ராணுவத்தினரால் நடத்தப்பட்ட திட்டமிட்ட சதி. இந்த விமான விபத்தில் சிதிலமடைந்த பாகங்கள் எதுவும் மிஞ்சவில்லை என்பது ஆச்சிர்யத்திற்குண்டான ஒன்று என கேள்வி எழுப்புகிறது! விபத்துகளை பற்றி காண்பிக்கப்பட்ட அத்தனை புகைப்படங்களும் ஜோடிக்கப்பட்டவை, விமானத்திலிருந்து, அதுவும் முப்பதாயிரம் அடிக்கு மேல் பறக்கும் பொழுது செல் போனால் பேசுவது சாத்தியமில்லை! ஆக இந்த விமானம் தாக்குதலுக்குள்ளனா போது பயணம் செய்து பயணியர் செல்போன் கொண்டு தத்தம் உறவினர்களை அழைத்து விமானம் கடத்தப்படுவதை சொன்னதாக கூறியது எல்லாம் ஜோடிக்கப் பட்ட கதை என்று கூறுகிறது! (அவர்கள் கூறுவதோ என்னவோ வாஸ்தவமே, நானும் முப்பதாயிரம் அடிக்கு மேலே பறக்கும் பொழுது என் செல் போனை நோண்டி பார்த்திருக்கிறேன், சிக்னல் இருக்கிறது என காண்பிக்கும், ஆனால் பேச முற்பட்டு தொடர்பு கொள்ள முயன்று பலமுறை தோல்வியுற்றிருக்கிறேன்!)

அடுத்து இச்சம்பவங்களால் அடிக்கப்பட்ட கொள்ளைகள், அதாவது முன்பே கூறியது போல காப்பு மோசடி ஊழல்கள் போன்றவற்றால் அடித்த கொள்ளைகள்! அதாவது இச்சம்பவம் நடைபெற சில ஆறு வாரங்களுக்கு முன்னே தான் 'Larry A. Silverstein' என்கிற ரியல் எஸ்டேட் துறையில் முதலீடு செய்யும் தொழிலதிபர் இந்த "World Trade Center" கட்டிடங்களை குத்தகைக்கு எடுத்து, இது போன்ற தீவிர வாத கட்டிட விமான தாக்குதலுக்கு எதிரான காப்புரிமை எடுத்தார். ஆக முன்கூட்டியே திட்டமிட்டு குத்தகை எடுத்து காப்புரிமை அதன் பேரில் எடுத்து, இச்சம்பவத்தின் மூலம் பல பில்லியன் டாலர்களை வருமானமாக ஈட்டினார் என்ற குற்றச்சாட்டுடன் திரைப்படம், இச்சம்பவத்துடன் இணைந்த அத்தனை ஊழல்களையும் காண்பிக்கிறது!

ஆக இவை அனைத்தும், சுமார் ஒன்றாரை மணி நேரம் ஓடக்கூடிய இத்திரைப்படத்தில் நீங்கள் காணலாம். இந்த டாக்குமெண்டரி படத்துக்கு எதிர்ப்பு தெரிவித்தும், விமரிசனம் செய்தும் கண்டன வெப்சைட்களும், இந்த டாக்குமெண்டரி படத்தில் கூறப்பட்ட ஒவ்வொரு விளக்கத்திற்கும் எதிர் விளக்க பதில்களும் சொல்லி தரநிர்ணய கட்டுபாட்டு துறையும் விளக்கி இருக்கும் பக்கங்களையும் நீங்கள் இணையத்தில் காணலாம்! ஆனால் கொஞ்சம் கொஞ்சமாக இந்த விளக்க உண்மைகளை அமெரிக்க மற்றும் கனடா வாழ் மக்கள் நம்ம ஆரம்பித்துள்ளனர். ஆக மாறி வரும் உலக அரசியலில் நடந்து முடிந்த இந்த சம்பவங்களினால் நம் கண்ணதாசன் பாடியது போல 'யாரைத்தான் நம்புவதோ இந்த புண்ணிய பூமியிலே என புலம்பத்தான் வேண்டும்! இங்கு நடந்து முடிந்த அனைத்து சதித்திட்ட அரசியலும் நமக்கொன்றும் புதிதல்ல! நம் நாட்டில் அன்றாடம் நடப்பது தான்! படிப்பறியா நம் மக்களுக்கு இது போன்ற கண்டுபிடிப்பு விளக்கத் திரைப்படங்கள் ஒன்றும் ஆச்சிரியமில்லை! ஆனால் படித்து முன்னேறிய இந்த பக்க பூமியில், இது போன்ற விளக்க திரைப்படங்கள் பெரும் சர்ச்சையுடன் மக்களிடையே பெரும் சலசலப்பை ஏற்படுத்தி இருக்கிறது! ஆனால் நான் கூறியது போல வளர்ந்த தொழில்நுடபத்தினால், சராசரி மனிதனும் திரைப்படமெடுத்து கலக்கலாம்! வார்னர் பிரதர்ஸ், யுனிவர்சல், ஏவிஎம் போன்ற பெரும் திரைப்பட நிறுவனங்கள் தேவையில்லை!

இத்திரைப்படம் எந்த திரையிலும் வெளியிடப்படவில்லை! நீங்கள் இணையத்தில் மட்டும் கண்டு களிக்கலாம்! இந்த திரைப்படம் உலக மக்களால் அதிகமாக பார்க்கப்பட்ட படங்களில் ஒன்று. உங்களுக்காக இதோ கீழே!

2026ல் உலக அரசியல் - ஒரு கண்ணோட்டம்!

சரியா இன்னும் 20 வருஷம் கழிச்சு பார்த்தா இந்த உலகம் எப்படி இருக்க போகுதுன்ன்னு நினைச்சு பார்க்கிறதுண்டா? இல்லேன்னா கொஞ்சம் பார்க்கலாம் வாங்க! சரி, சரித்திரம்னு எடுத்துக்கிட்டா, அது ஒரு கோடு கிழிச்ச மாதிரி நேரா கிழிச்சி இப்படி தான் நடந்ததுன்னு சொல்லிட முடியாது! ஏகப்பட்ட ஏற்றம் இறக்கங்கள் கொண்டது, ஒரு காலத்திலே நம்மளும் சைனாவும் தான் ராஜா உலக பொருளாதாரத்திலே, செல்வ செழிப்புல, ஆடம்பரத்திலே, அப்புறம் வாழ்க்கையை அணு அணுவா ரசிச்சு வாழ்றதுல்ல, ஏன்னா அப்படி பட்ட பூமி நம்மது, அதுனால தான் காமசூத்திரம் எழுதியும், அழகு அழகா சிற்பம் செதுக்கியும் அந்த காலத்திலே கழிச்ச கேளிக்கைகளின் நவரசத்தை செதுக்கி வச்சி, ஒய்யார வாழ்க்கை வாழ்ந்து வந்தோம்! அப்பறம் என்னாச்சு, கொஞ்சம் கொஞ்சமா உலகின் மத்த பாகங்கள்ல இருந்து கடல்ல நிலம் தேடி, நல்லா ஆடம்பரமா இருந்து சுகவாசி வாழ்வு வாழ்ந்த இடங்கள் எங்கேன்னு தேடி, கொஞ்சம் தன்னோட புத்தியை உபயோகிச்சு, எப்படியும் முன்னேறி வாழ்னும்னு தேசம் விட்டு வந்த மாற்று கண்டத்துக்காரங்க அப்படியே கொஞ்சம் கொஞ்சமா இப்படி செழிப்பா வாழ்ந்து கழிச்ச இடங்களை அண்டி, கடைசியிலே அதையே புடிச்சி ஆட்சி செஞ்சு நாம் தலைகீழ் ஆனது சரித்திரம்! ஆனா எதிர்காலம் மட்டும் அப்படி எதிர்பார்த்தது போல கிழிச்ச ஒரே நேர்கோட்ல ஏத்தம் இறக்கம் இல்லாம மாறிவுடுமா என்ன? அது அப்படி எப்படித் தான் மாறப்போகுதுங்கிறதை கொஞ்சம் பார்ப்போமா?

இன்னும் சரியா 20 வருஷத்திலே பார்த்தீங்கன்னா, சைனாவோட பொருளாதாரம் அமெரிக்காவை தூக்கி சாப்பிட்டுடும்! அப்புறம் நம்ம பொருளாதாரத்தை எடுத்துக்கிட்டா, எந்த ஒரு ஐரோப்பிய நாட்டைவிட அதிகமா இருக்கும். அப்புறம் ரஷ்யா, பிரேசில், இந்தோனேஷியா, இவெங்கெல்லாம் எல்லாத்தையும் பின்னாடி தள்ளிட்டு முன்னே வந்திடுவாங்க! ஊரு உலகம் முழுக்க இனி பாட்டு படிக்கப்போறது ஆசியாவை பத்தி தான், அதுவும் "Asian values", "Beijing consensus", அப்படின்னு ஒரே புராணம் தான் பத்திரிக்கை, அப்புறம் எல்லா ஊடகமும் பாட்டு படிக்க போவுது (இப்பவே அப்படி பாட ஆரம்பிச்சு ரொம்ப நாளாச்சு!) இந்த நாடுகள் எல்லாம் வளர ஆரம்பிச்சோன, நிறைய தட்டுப்பாடு வரப்போவுது, இயற்கை செல்வங்களுக்கும், மனித குலத்துக்கும் தான்! உலகமே நொறுங்கி நிக்க போகப்போகுது மூணு விஷயத்துக்கு, ஒன்னு எண்ணெய், இன்னொன்னு தண்ணீர், மூணாவது விஷயம் தெரிஞ்ச, சாமர்த்தியம், திறமை கொண்ட தொழிலாளர்கள்!

ஆனா பெரும் சக்திகள், வல்லரசுகள்னு சொல்லப்பட்ட நாடுகள் எல்லாம் பெரியதொரு தாக்குதலுக்கு உட்படுத்த படுவார்கள்! அழிவுகள் அனைத்தும் தனிவுடமை ஆக்கப்படும், ஆமா, தன் படுக்கை அறையிலிருந்து உலகத்தை ஆட்டி படைப்பார்கள் கம்ப்யூட்டர் நெர்ட்ஸ்னு சொல்லக்கூடிய அதி புத்திசாலிகள், அதே மாதிரி தீவிர வாதிகள் உலக சந்தையில் விக்கக்கூடிய பேரழிவு சாதனங்களை, அனைவரையும் கொல்லும் ஆய்தங்களை ('Weapons of Mass Destruction') சுலபமா வாங்கக்கூடும்! தனிமனித கும்பல்கள் ஒரு தேசத்தையோ, இல்லை மாநிலங்களையோ அழிக்கக்கூடும்! இந்த தாக்கப்படும் அபாயத்தால், பாதுகாப்பு அளிக்கும் ஏகாதிபத்தியத்தை ('Defensive Imperialism')கடைபிடிப்பார்கள் பெரும் வல்லரசு என அழைக்கப்படும் நாடுகள்! அதாவது, வல்லரசு நாடுகளின் ஆக்கிரமிப்புகள், இது போன்ற தீவரவாதம் வளரும் பகுதிகளையும், நாடுகளையும் கைப்பற்றி தங்கள் கட்டுப்பாட்டுக்குள் வைத்திருப்பார்கள், இப்போது அமெரிக்க ஆக்கிரமிப்பு கட்டு பாடு கொண்ட ஈராக், ஆப்கானிஸ்தானம் போல!

பொருளாதார இமயங்கள் ('Economic Mights') உலகத்தின் வடக்கிலிருந்தும், மேற்கிலிருந்தும் மாறி தெற்கு, கிழக்கு பகுதிகளில் வியாபித்து விடும், அதனால் கலாச்சார சக்திகளும் ('Cultural power')மாறிவிடும்! வளர்ந்து வரும் அல் ஜாசீரா போன்ற ஊடகங்கள் 'சி என் என்' போன்றவற்றை விட வழுபெற வாய்ப்பு இருக்கிறது! பிறகு நமது 'பாலிவொட்' ஒரு பெரிய தாக்கத்தை ஏற்படுத்த போகிறது! இதனால் என்ன ஆகுமென்றால் உலகம் எல்லாவற்றையும் அமெரிக்க கண்கள் கொண்டு பார்க்கப்போவதில்லை! நமது பழமையான நாகரீகம் மீண்டும் தளிர்த்து எழுத்து புத்துணர்வுடன் பீறு நடைப்போடப் போகிறது! அதிக சுயநம்பிக்கையுடன் எழுந்தாடப்போகிறது மேற்கத்திய நாகரீகத்தை விட, எல்லோரும் அமெரிக்காவில் சாம்பாரும், கறிக்கொழம்பும் சாப்பிடுவது சாத்தியமே! அதைவிட அதிக நம்பிக்கையுடன் நமது கருத்துக்கள் மேலோங்கி நிற்கும்! குடியுரிமை, சுதந்திரம், சட்ட விதிகளில் நமது எண்ணங்கள் தழைத்தோட போகிறது!

இந்த போக்குகள் வரும் பொழுது, 2026 ஒரு புதிய உலக ஆணையை ('World Order') மட்டும் சந்திக்கப்போவதில்லை, நான்கு உலக ஆணையை சந்திக்கவிருக்கிறது! உலகம் நான்காக பிரிந்து இருக்கும் வாய்ப்புகள் இருக்கிறது! அதாவது இரண்டு அட்சுகளால் சுழலப்படும் நான்கு துருவ உலகம் வர வாய்ப்புள்ளது! மக்கள் பலம் பொருந்திய குடிஆட்சி கொண்ட உலகம் ஒரு பக்கமும், கொடுங்கோன்மை மேலோங்கிய சர்வாதிகார ஆட்சி கொண்ட உலகம் மறுபக்கமும் ஒரு அட்சில் சுழலப்போகிறது! அதே போல சமசீர்தூக்கிய பலம் ('Balance of Power')கொண்ட நாடுகள் ஒரு பக்கமும், பன்னாட்டு சட்டத்திட்டங்களுக்கும், ஸ்தாபனங்களும் அடங்கி வாழும் நாடுகள் கொண்ட இன்னொரு பக்கமும் அடங்கிய இன்னொரு அட்சும் சுழல இருக்கிறது!

இதிலே அதிக வல்லமை படைத்த துருவமாக அமெரிக்காவும் அதை சார்ந்த இந்தியாவும் வர வாய்ப்பிருக்கிதறது! ஆனால் சரிந்து விழும் டாலர் மதிப்புகளும், உலகம் முழுக்க அதிக இராணுவ தடம் பதிப்புகளையும் கொண்ட அமெரிக்கா உலக நாடுகளால் கவர்ந்துழுப்பதை காட்டிலும் துரத்தி விடப்படுவதை அதிகம் காணலாம்! அதன் தொன்று தொட்ட தோழமைகளான ஐரோப்பிய ஐக்கிய நாடுகள், ஜப்பான், மற்றும் தெற்கு கொரியா போன்ற நாடுகள் அவ்வளவாக அமெரிக்க தலைமைக்காக, எவ்வாறு சோவியத் யூனியனிடன் நடந்த பனிப்போரில் ஆர்வம் காட்டினவோ, அவ்வாறு ஆர்வம் காட்டப்போவதில்லை!

உலகத்தின் மேற்கிலே பல்கேரியா, ரோமேனியா, நார்வே, சுவிட்சர்லாந்து, துருக்கி, உக்ரைன், மோடோவ்வோ, போன்ற நாடுகள் கொண்ட ஒரு அகண்ட ஐரோபியகுழுமம் குடியரசு ஆட்சி முறையை பெரிதும் நம்பி, அமெரிக்க, இந்திய நாட்டு குடிஆட்சிகளின் தன்மையில் கொண்ட நம்பிக்கையை தாங்களும் கொள்ள வாய்ப்பிருக்கிறது! ஆனால் அமெரிக்காவுடன் கூடிய உறவை துண்டித்துக்கொள்ள விரும்புவார்கள்! முன்பு சோவியத் பிளாக் என்றழைக்கப்பட்ட 70க்கும் மேற்பட்ட சிறிய நாடுகள், மத்திய கிழக்கு, ஆப்பிரிக்க நாடுகள் அனத்தும் வணிகம், மற்றும் முதலீடு, உதவித்தொகை பெறுவது போன்ற அனைத்திற்கும் ஐரோபிய குழுமத்தை நம்பி இருக்கப்போகிறார்கள்! சிறுக சிறுக ஐரோபிய வணிக முறை மற்றும் செயல்பாடுகளில் முற்றிலும் ஈர்க்கப்பட்டுவிடுவார்கள் இவ்வனைத்து நாடுகளும்!

ஐரோப்பாவின் கிழக்குப்பகுதி ரஷ்யா, சைனாவால் ஈர்க்கப்பட்டு, தங்களின் சர்வாதிகார ஆட்சி தன்மையை நிலைநிறுத்த முற்படுவார்கள்! அவர்கள் அனைவரும் பலதரப்பினை கொண்ட ஆட்சிஅமைப்பை ஏற்படுத்தி சர்வாதிகாரம் கொண்ட உலகத்திற்கு வழி வகுப்பார்கள்! ரஷ்யா ஐரோப்பிய வாழ்க்கை மதிப்புகளை தடுக்க எல்லா வகையிலும் முற்பட்டு தங்கள் ஆதிக்கத்தை நிலைநாட்ட முற்படுவார்கள்! சைனாவின் அசுர பொருளாதார வளர்ச்சி சர்வாதிகாரிகளுக்கு ஒரு ஒளி விளக்காக அமையும்! தங்களின் ஆளுமையை விட்டுக்கொடுக்காமல், வளர்ச்சியடையவே முற்படுவார்கள், அதனால் அந்நாட்டு மக்களின் சுதந்திரம் அடக்கி ஆளப்படும்! சைனா, ரஷ்யா மற்றும் கஷக்கிஸ்தான், கிர்கிஷ்த்தான், தஜக்கிஷ்த்தான், உஜபெக்கிஷ்த்தான் போன்ற நாடுகளுடன் கைகோர்த்து ஷாங்காய் கூட்டுறவு கொள்கை என்ற ஒன்றை உருவாக்கி இப்பொழுது இருக்கும் பொருளாதார வல்லமை பொருந்திய, மற்றும் பொருளாதார அடக்குமுறை கொள்கைகளை கையாளும் G7 என்ற நாடுகளின் கூட்டமைப்புக்கு எதிர் குரல் கொடுப்பார்கள்! மேலும் பலதரப்பட்ட ஸ்தாபனங்களில் தங்களை நிலைப்படுத்திக்கொண்டு ஐரோப்பிய குழுமத்தில் தங்கள் வணிக வல்லமையை வழுப்படுத்தி அமெரிக்காவை அடக்கி ஆள முற்படுவார்கள்

அடுத்த துருவம் நம்பிக்கை பிராந்தியம்-இது குடிஆட்சி முறைகளாலோ இல்லை சட்டவிதிகளாலோ விளக்கப்படும் ஒன்றல்ல! 2026ல் மதச்சார்பற்ற ஐரோபிய கண்டம் மத எதிர்ப்பு வாதத்தால் பந்தாடப்படும்! முஸ்லீம் உலகம் அதற்கு முதல் வரிசையில் நின்று ஆட்டுவிக்கும்! மத்திய கிழக்கு நாடுகளான லெபனான், பாலஸ்தீனம், ஈரான் போன்ற நாடுகள் ஒரு புதுவிதமான முஸ்லீம் குடியாட்சியினை கொண்டு வர முற்படும்! ஆனால் அதிகமான நாடுகள் எந்த அரசியல் மாற்றத்தையும் சமூக தேவைகளுக்கு ஏற்ப அவ்வளவு விரைவாக கொண்டு வருவதில் முனைப்பாக இருக்காது! சவுதி அரேபியா, எகிப்து, ஈராக் போன்ற நாடுகளில் ஊழல்புரியம் சீமாந்தர்கள், இஸ்லாமியர்களால் துடைக்கப்பட்டு வெளியேற்றப்படுவர், அதுவும் பன்னாட்டு துணைக்கொண்டு!

அனத்து நாடுகளும் செல்வாக்கு கொண்ட புது கோளத்தின்( 'sphere of Influence') ஒரு பகுதியாக இருக்கப்போவதில்லை! இந்த செல்வாக்கினையுடய கோளங்களை அடைவதற்கான உலக சண்டையில் எந்தப்பக்கமும் சாயக்கூடிய நாடுகளின் மீது எல்லோர் கண்ணும் இருக்கும்! இந்த செல்வாக்கினை நிலை நிறுத்திக்கொள்ளும் போட்டியில் முற்படப்போவது தென்கிழக்கு ஆசியா, மத்திய ஆசிய, காக்கஸ் என்றழைக்கப்படும் பகுதியான காஸ்பியன் மற்றும் கருப்பு கடலை ஒட்டிய பகுதியும் மத்தியகிழக்கு ஆசிய பகுதியும் தான்! எந்தப்பக்கமும் சாயக்கூடிய தன்மையில் உள்ள நாடுகளில் இந்தியா மிக முக்கியமான ஒன்று!

இந்த நான்கு துருவ உலகானது தங்களை நிலைநிறுத்திக்கொள்ள, தங்கள் வல்லமையை நிலைநிறுத்த எப்பாடுபட்டாவது சண்டை போடும் அளவிற்கு செல்ல வாய்ப்பில்லை, ஆனால் இந்த நம்பிக்கை பிராந்தியம் என்று சொல்லக்கூடிய துருவத்தில அதி தீவிர வாதம் வளர வாய்ப்பிருக்கிறது! ஆனால் இந்த நான்கு துருவங்களையும் கட்டிபோட்டு வைப்பது ஒற்றை பொருளாதார அமைப்பு ('Single Economic System'), அதில் அனைத்து துருவங்களும் போட்டி போடுக்கொண்டு வணிகம், வர்த்தகம், முதலீட்டினை அதில் ஒருவொருக்கொருவர் செய்து கொண்டிருப்பார்கள், அதுவே அனைத்தையும் சமன் செய்யும் மிருதுவான வல்லமை கொண்டிருப்பதால், ஒன்றுக்கொன்று பரஸ்பரம் உறுதியுடன் இருப்பது என்னவோ முற்றிலும் உண்மை!

அமெரிக்கா அறிவாளிகளை புறக்கணிக்கறதா?

இப்பொழுது லாஸ் ஏஞ்சிலேஸ் நகரிலும், சிகோகா நகரிலும் நடந்து வரும் இந்த சட்டத்தை மீறி வந்த வந்தேறிகுடிகளின் ஆர்ப்பாட்டங்களும், கோபமடைந்து அமெரிக்க எல்லைகளை மூடச்சொல்லி ஆர்பரிக்கும் அமெரிக்க காங்கிரஸ் உறுப்பினர்களை பார்க்கும் பொழுது, அமெரிக்காவின் பிம்பம் ஒன்றை மட்டும் உறுதியாக கூறுகின்றன. இதுவரை கதவுகளை திறந்து வைத்து இருகரம் கொண்டு உலகெங்கும் இருக்கும் அறிவாளிகளை அழைத்து அனைத்துக் கொண்ட அமெரிக்கா இனி அவ்வாறு செய்யப்போவதில்லை. அதனால் யாருக்கு இழப்பு? அமெரிக்காவிற்கு தான், எப்படி, வாருங்கள் பார்க்கலாம்!

நான் ஏற்கனவே எழுதிய 'அமெரிக்க முதலாளித்தவமும் வந்தேறிகுடிகளும்!' பதிவில் இந்த ஆர்ப்பட்டத்திற்கான காரணத்தையும், அமெரிக்கா எப்படி இந்த சட்டத்தை மீறி வந்த வந்தேறிகுடிகளை வெளி துரத்த முயலுவதையும், அமெரிக்க முதலாளித்துவத்தின் அரசியலையும் எழுதி இருந்தேன். ஆனால் இப்பொழுது நடைபெறும் இந்த போராட்டத்தால் "Knoweledge workers" என்போரின் கதி என்னவாகும் என்பது தான் பதிவின் நோக்கம்! கம்ப்யூட்டர் புரோகராமர்ஸ் என்றழைக்கப்படும் இந்த அறிவு செல்வங்கள் எவ்வாறு இந்த அமெரிக்காவிலே வழிநடத்தப்படுகிறார்கள் என்பதை சற்று பார்ப்போம்! இதில் ஒரு விந்தை என்ன தெரியுமா, இந்த "Knoweledge workers" என்போரின் தேவை, இந்த சட்டத்தை மீறி வந்த வந்தேறிகுடிகளை ("illegal immigrats") விட அதிகம், அதை அமெரிக்கா உணர்ந்திருக்கிறதா என்றால், அது தான் இல்லை. எப்படி என்று பார்ப்போம்!

அமெரிக்காவின் அதி தொழில்நுட்ப தொழிற்சாலைகளை இன்று வழி நடத்துபவர்கள் யார் தெரியுமா? அனைவரும் இந்த அமெரிக்காவில் பிறந்த குடிமகன்ங்கள் அல்ல! அதிலும் சிலிக்கான்வேலி என்றழைக்கப்படும் கலிஃபோர்னியா மாகாணத்தில் இருக்கும் வளைகுடா பகுதியிலே, 1980ம் ஆண்டிலிருந்து இன்றுவரை தொடங்கப்பட்ட அதி தொழில்நுட்ப ஸ்தாபனங்கள் 3000க்கும் அதிகம். அதிலும் இந்த தொழில் நிறுவனங்களுக்கு நிதி அளித்து ஆரம்பித்து வைத்தவர்கள் நம் இந்திய நாட்டினர் மற்றும் சைனாவை சேர்ந்தவர்கள் . அப்படி தொடங்கபட்ட நிறுவங்களில் 30 சதவீதத்திற்கும் மேல் நிர்வாகிப்பது நம் இந்திய நாட்டு மக்கள்! இந்த அமெரிக்க நாட்டில் உள்ள முன்னனி பல்கலைகழகங்கள் அனைத்திலும் உள்ள விஞ்ஞானம் மற்றும் பொறியியல் துறைகளை நிரப்புவகர்கள் யார் தெரியுமா? உலகெங்கிலுமிருந்து வந்து சேரும் அறிவாளி மாணவர்கள். அப்படி வந்து இந்த பல்கலைகழகங்களில் படித்து முன்னேறியவர்கள், இங்கேயே தொழிற்கற்று, வெகு மேலே சென்று சொத்து சுகங்களை சம்பாதித்தவர்கள். தாங்கள் மட்டும் செல்வங்களை பெறவில்லை, இந்த அமெரிக்க நாடும் அவர்களால் செல்வங்களை பெற்றது என்பதே உண்மை!

ஆனால் இப்பொழுது அமெரிக்காவிற்கு ஏற்பட்டிருக்கும் மரணபயம், அதாவது நாட்டின் பாதுகாப்பு எனக்கருதியும், மற்றும் அவர்கள் பொருளாதார பாதுகாப்பென்று கருதியும், அமெரிக்கா பயத்தின் விளிம்பிற்கு சென்று மிக அத்தியாவசியமான, நாடு முன்னேற்றம் காண வரும் திறமைகளை புறக்கணிப்பதே! 2001ல், 200,000 பேருக்கு H1B விசாவை அளித்து, அறிவாளிகளையும் அதிதொழில்நுட்ப வல்லுநர்களையும் ஏற்று கொண்ட அமெரிக்கா, 2004ம் ஆண்டிலிருந்து வெறும் 65,000 அறிவாளிகளையும் அதி தொழில்நுட்ப வல்லுநர்களையும் மட்டுமே ஏற்று கொண்டது. அதன் படி, சென்னையிலே இருக்கும் அமெரிக்க தூதரகத்தில் விசாவிற்கான நேர்கானல் அழைப்புக்கு காத்திருக்க வேண்டிய நாட்கள் எவ்வளவு நாள் தெரியுமா? 160 நாட்களுக்கும் மேலே! இதைப்பற்றி பில் கேட்ஸ், அமெரிக்க காங்கிரஸக்கு எழுதிய கடித்ததில், இந்த அறிவாளிகளையும் திறமை மிக்கவர்களையும் நாம் இழந்தால் அமெரிக்காவின் போட்டி பன்னாட்டு சந்தையில் பலவீனமாகும், நம் நாட்டின் இழப்பு, அடுத்த வளர்ந்த நாடுகள், அவ்ர்களை பெற்று, சுலபமாக இதனால் பயனடைவார்கள் என்று குறிப்பிட்டிருந்தார்!
அதில் அவர் தெரிவிக்காத ஒரு உண்மை, அமெரிக்க கம்பெனிகள் இந்த விசாவிற்கென இனி காத்து கிடக்காமல் தங்கள் தொழில்களை அடுத்த நாட்டுக்கு கொண்டு சென்றுவிடுவதை. அதிலும் மைக்ரோசாஃப்ட் நிறுவனத்தின் ஆராய்ச்சிக்கூடம் அமெரிக்காவை விடுத்து, நம் பெங்களூரிலும், சைனாவின் பீஜிங்கிளும், இங்கிலாந்தின் கேம்பிரிட்ஜிளும் இயங்குகின்றன. ஆக நஷ்டம் அமெரிக்காவிற்குத்தான் என்பதை சொல்லாமல் சொல்லிவிட்டார்!

ஆக இப்பொழுது உள்ள நிலை, அமெரிக்க பொருளாதாரத்துக்குள்ள மிக மோசமான நிலை. அதை கருத்தில் கொண்டு அமெரிக்காவினர் விசா வழங்குவதையும், 'green card' கொடுப்பதையும் அதிகரிக்க வேண்டும், இந்த இம்மிகிரேஷன் பில்லை சட்டமாக்கும் பொழுது! அதிலும் அமெரிக்க கம்பெனிகள் திறமைசாலிகள் தேவை எனும் பொழுது, அவர்கள் சட்டப்படி அத்திறமை சாலிகளை அழைக்கும் பொழுது , வேண்டிய விசாக்களை கொடுத்து அவர்களை ஏற்று கொள்ள வேண்டும் அதிலும் கீழ் நிலை வேலை செய்பவர்களின் போட்டி இந்த சட்டமற்ற முறையில் வந்த வந்தேறிகுடிகளினால் அதிகம் இருந்தாலும், திறமைசாலிகளின் தேவை கொண்டு அவர்களை இரு கரம் கூப்பி வரவேற்க வேண்டும். இல்லையெனில், அவர்களை கடந்து, முன்னேற்றம் காண பல நாடுகள் துடித்துக் கொண்டிருக்கின்றன. இதனால் அமெரிக்காவின் நட்டம் மற்ற நாடுகளுக்குண்டான லாபம்! ஒன்றை அமெரிக்கா ஞாபகத்தில் வைத்துக் கொள்ள வேண்டும், அந்நாட்டின் பல்கலைகழகங்களும், அதிதொழில்நுட்ப தொழில்களும் அனைத்துலக திறமைசாலிகளை கவர்ந்த காந்தங்கள்! அதனால் பயனடந்தது அமெரிக்கா மட்டுமல்ல, உலகமும் தான். ஆனால் பயம் என்று ஒன்று இப்பொழுது அவர்களை ஆட்டி படைக்கிறது!

மேற்கொண்டு, உலகிலுள்ள பல நாடுகள், முக்கியமாக,ஆஸ்திரேலியா, கனடா, சுவிட்சர்லாந்து போன்ற நாடுகள் இத்திறமைசாலிகளை மிகவும் வெற்றிகரமாக வயப்படுத்தி தன்னாட்டிற்கு அழைத்துக் கொள்கிறார்கள். இப்பொழுது இந்தியாவிலும், அமெரிக்க கனவுகளை துறந்து இது போன்று முன்னெறிய நாடுகளில் சென்று மேற்படிப்புத் தொடரும் நிலை இன்று பரவலாக இருக்கிறது! இன்று நம் நாட்டிற்கே உள்ள பலம் நம் மக்கட் தொகை, அதிலும் நன்கு கல்வியறிவு பெற்று, புலமைபடைத்த நம் இளஞ்சிங்கள்!அவை தான் நாளை உலக ஆளப்போகின்றன! ஆம், ஐரோப்பிய நாடுகளில் மக்கட் பெருக்கம் நின்று போய் பல நாட்கள் ஆகிவிட்டன.
அனைத்து ஐரோப்பிய நாடுகளும் இப்பொழுது உலகத்தின் மற்ற பகுதியிலிருந்து வரும் வந்தேறிகுடிகளை இருகரம் கொண்டு அனைத்துக்கொள்ள தயாராகிவிட்டன. அதிலும் காலங்காலமாக அங்கு சென்று குடியேறிய மத்திய கிழக்கு ஆசிய நாடுகளின் குடிமகன்ளால் ஒரு போராட்டமான நிலை இருப்பதால், அவர்களை விட இந்தியா, சைனா போன்ற நாடுகளின் குடிமகன்களை அதிகம் அனைத்துக்கொள்ள தயாராகிவிட்டன. அவர்கள் கொண்ட தொழிற்புரட்சியின் ஆளுமை தொடர்ந்து இருக்க வேண்டுமென்றால், இந்த இளம் மக்கள் தொகையும், அதிலும் அறிவாளிகளின் தேவை இப்பொழுது அதிகம்! அது அவர்களிடம் இல்லை எனும் போது நம் போன்றோரின் துணையை நாட ஆரம்பித்துள்ளனர். இதனால் நமக்கு லாபமாகுமா?. இது 'Brain Game' என்ற சித்து விளையாட்டே! முன்னேறிய நாடுகள் இப்பொழுது இதில் ஈடுபட்டுள்ளன! முன்பெல்லாம் நாம் சொல்லிகொண்டிருந்த 'Brain drain' என்பது இனி 'Brain Gain' ஆகுமா, அப்படி த்தான் ஆகிக்கொண்டிருப்பதாக சொல்கிறோம், இந்த அமெரிக்க புறக்கணிப்பிற்கு பிறகு! ஆனால் உலகம் வேறு திசையில் போய் கொண்டிருக்கிறதென்பதையும் நாம் அறிந்து செயல்பட்டால் நமக்கு நன்று! வல்லரசு கனவுகளை நனவாக்குமா இனி வரும் நாளை? அதெற்கென நம் கையில் இருக்கும் செல்வங்களின் மதிப்பை நாம் உணர்ந்து செயலாற்றினால் உண்டு! அப்பொழுது தான் நாம் ஆளமுடியும் உலகை, நாளை!

ஆப்பிரிக்காவின் யுத்தபூமி- இன்னொரு இலங்கையா?

நம்ம தான் உலகத்திலே இருக்கிற அத்தனை டிவி சேனல்களியும் பார்த்துக்கிட்டிருக்குமே, என்ன தான் ஊடகம் இரு சில குடும்ப சொத்தா இருந்தாலும், சில சமயங்கள்ல மத்த சேனல்கள்ல வருகிற நியூஸையும் பார்க்க உங்களுக்கு ஒரு சந்தர்ப்பம் கிடைச்சிருக்கும்னு நினக்கிறேன். தமிழக தேர்தல்கள் ரொம்ப தீவிரமா நடந்துகிட்டு அதை பத்தின செய்திகளுக்கு மத்தியில, அதையும் மீறி இப்படி வெளி உலக செய்திகள் பார்க்கக்கூடிய ஆளா இருந்தீங்கன்னா, இன்னைய தேதிக்கு நம்ம இலங்கை தமிழர்களுக்கு நடக்கிற கொடுமை போல உலகத்தில மிகவும் ஏழ்மையான கண்டமான ஆப்பிரிக்காவில சூடான் என்கிற ஒரு நாடு கேள்விபட்டிட்ருக்கிங்களா, அங்க இதுவரைக்கும் இல்லாத மனித உரிமை அத்து மீறல் நடந்துக்கிட்டிருக்கிறது. கிட்டதிட்ட நம்ம இலங்கை தமிழர்கள் மாதிரியே அங்கு பாதிக்கப்பட்டவங்க பழங்குடி கறுப்பர் இனம். போராட்டம் அந்த சூடான் நாட்டை ஆளும் அரேபியர் பெரும்பான்மையினரின் அரசாங்கத்துக்கும், அரேபியர் அல்லாத கறுப்பர் இனத்தை சார்ந்த பழங்குடி மக்களுக்கும். இது சரியா நம்ம இலங்கை பிரச்சனைபோல நாட்டை ஆளும் சிங்களவருக்கும் நம் தமிழருக்கும் நடக்கும் போராட்டம் போல! அதிகம் கவலையோட உலகில் உள்ள அனத்து நாடுகளும் எதிர் நோக்கி நிற்கும் இந்த மனித உரிமை மீறல் நிகழ்ச்சி மிகவும் சோகமான ஒன்னு. கொஞ்சம் என்னான்னு தான் பார்ப்போமே!

செங்கடலை ஒட்டி எகிப்து நாட்டுக்கு கீழே, உலகிலேயே மிக வருமையில் வாடும் இத்தோப்பியா நாட்டின் மேற்கே இருக்கும் நாடுதான் இந்த சூடான் நாடு. இதுவும் அரோபிய நாடுகளை போல கொஞ்சம் எண்ணைய் வளம் மிக்க நாடுங்கிறதே இங்க குறிப்பிட வேண்டிய ஒன்னு! இந்த நாட்டின், வடக்கு, மேற்கு பகுதியான டர்ஃப்ர் (Darfur) ங்கிற பகுதியிலே தான் இந்த போராட்டம், யுத்தம், சாவு, மனித உரிமை மீறல்! இந்த பகுதியிலே இருக்கிர ஒரு 450 கிராமங்கள் இந்த சண்டையினால சுத்தமா அழிஞ்சு போச்சு! மிச்சம் இருக்கிற இன்னொரு 125 கிராமங்களும் இந்தோ அந்தோன்னு கலவரத்தில பாதிக்கபட்டு இருக்கு.இந்த பகுதியிலருந்து சுமார் 200,000 பேரு அகதிகளா பக்கத்து நாடான ச்சாட் (Chad)ங்கிற நாட்டின் கிழக்கு பகுதியில தஞ்சமமடைஞ்சிருக்காங்க. கிட்ட தட்ட 60 லட்சம் மக்களை கொண்ட இந்த டர்ஃப்ர் (Darfur) பகுதியிலே சுமார் 12 லட்சம் பேரு அகதிகளா அங்கேயே இருக்காங்க. இந்த மாதிரி இருக்கிற நிலம் வீடு சொத்துக்களை விட்டு அகதிகளா வந்தந்தவங்க சரியான பாதுகாப்பு இல்லமா, சோறு தண்ணி கிடைக்காம அல்லாடுறாங்க. ஐக்கிய நாடுகளின் மிகப்பெரிய நிவாரண உதவியோட சுமார் 940,000 பேருக்கு சாப்பாடு, மற்றும் அகதிகள் முகாம் இட்டு பெரிய உதவிகள் நடந்துக்கிட்டு இருக்கு. அதிலயும் இந்த அகதிகள் கூட்டம் இருக்கிற மொத்தம் 154 முகாம்ல 72 முகாம்க்கும் மேலே இந்த சாப்பாடு, மருத்துவ உதவி எதுவும் போய் சேராமா ஒரு 200,000 பேருக்கு மேலே சாகும் தருவாயிலே இருக்காங்க! அதிலேயும் மூணுக்கு ஒரு குழந்தை ஊட்டசத்துல்லாம இறக்கும் தருவாயில் இருக்குதுங்க. இது தான் கொடுமை! அதனாலேயே உலகின் அனத்து நாடுகளும் இந்நாட்டின் மேல் கவனம் திருப்பி இருக்காங்க. அதுவும் உலகத்தின் முதல் மனித உரிமை அத்து மீறல் பிரச்சனைன்னு பிரகடனப்படுத்தி உதவி செய்ய முன் வந்திருக்காங்க.ஆனா அத்தனை உதவிகளும் இந்த பாவப்பட்ட மக்களுக்கு போய் சேருதான்னா, அதான் இல்லை, இது அதைவிட மிகப்பெரிய சோகம். ஏன்னா எல்லாமே சூடான் நாட்டு அரசாங்கத்தின் அராஜகத்தினால் , ஒட்டு மொத்த பகுதியும் துயரத்தில ஆழ்ந்திருக்கு!

இவ்வளவு துன்பங்களும் சொந்த நாட்டின் அரசாங்கத்தால் இந்த மக்களுக்கு வந்தது! கிட்டதிட்ட நம்ம இலங்கை போராட்டம் மாதிரியே தான். அதாவது நம்ம இலங்கையின் வடக்கு கிழக்கு மாகாணங்கள் எப்படி தமிழர்கள் பெரும்பான்மையா இருந்த பகுதியோ, அதே போல இந்த நாட்டின் வடக்கு மேற்கு பகுதியான டர்ஃப்ர் (Darfur) அரேபியர் அல்லாத கறுப்பர் இன பழங்குடி மக்களை கொண்ட பகுதியாகும். அதாவது சூடான் நாட்டின் ஐந்தில் ஒரு பகுதியாகும், அது போல மக்கள் தொகையில் சூடான் நாட்டின் மொத்த ஜனத்தொகையில் ஏழில் ஒரு பங்கு இந்த பகுதியில் வசித்து வந்தனர். காலங்காலமாவே, அதாவது நம் தமிழ் ஈழ பிரச்சனை ஆரம்பித்த 1980களிலிருந்தே, இந்த இனச்சண்டை இருந்து வந்திருக்கு. அதாவது அரேபியர்களின் ஊடுருவலால் மெல்ல மெல்ல இந்த தேசம் முழுவதுமிருந்து கறுப்பர்கள் துரத்தி அடிக்கப்பட்டார்கள்! ஆக அரேபியர்கள் பெரும்பான்மை கொண்ட அரசாங்கம், அரேபியர்களை கொண்ட போராளிகளின் துணையோடு இந்த கறுப்பர்கள் இனத்தின் மீது தாக்குதல் நடத்தினர். ஐக்கிய நடுகள் சபையின் தீர்மானத்தின் பேரில் கொண்டுவரப்பட்ட போர்நிறுத்த ஒப்பந்ததை மீறி இப்பகுதி மக்களின் கறுப்பர் இனப்படுகொலை நிகழ்ந்த வண்ணம் இருக்கு! கொலை, சித்திரவதை, கற்பழிப்பு, துப்பாக்கிச்சூடு, அகதிகளின் முகாம் தாக்குதல், கடத்தல், சூரையாடல், சொத்துக்களை அழித்தல், விளைபொருட்கள் அபகரித்தல் என அத்தனை கொடுமைகளையும் இப்பகுதி கறுப்பர் இனமக்களின் மீது தொடர்ந்து நடத்தி வந்தது 'ஜிஞ்சாவீத்'(Janjaweed) என்றழைக்கப்பட்ட அரேபிய போராளிகளும் அதுனுடன் சேர்ந்த இந்த சூடான் நாட்டு அரசாங்க இராணுவமும் ! இவர்களை எதிர்த்து போராட கறுப்பர் இன போராளிகள், சூடான் மக்கள் விடுதலை படை( Sudanese People's Liberation Army (SPLA)) இருந்தும் அவர்களுக்கு ஈடு கொடுக்க முடியாமல் தோற்று போயின!

பிறகு தொடர்ந்து நடந்த வந்த இந்த இனக்கலவரச்சண்டையால், அரேபிய போரளிகளும், கறுப்பர் இன போராளிகளும் சண்டையிட்டு அப்பாவி மக்களை கொன்று குவித்தனர், மேலும் சொந்த மண்ணிலே இந்த கறுப்பர் இனமக்கள் அகதிகளாயினர்! ஆனால் தொடர்ந்து நடந்த சண்டையில் அரேபியர் பெரும்பான்மை அரசு, அரேபிய போரளிகளுக்கு அதரவளித்து, இப்பகுதி மக்களை விமானத்தக்குதலுக்குட்படுத்தியது! அதனால் உயிரிழ்ந்தோர் பலர்! இந்த விமானத்தாக்குதலால் சொந்த மண்ணைவிட்டு ஓடி அகதிகளாக அண்டை நாடிகளிலும் தஞ்சம் புகுந்தனர்!

இந்த அகதிகளின் மீது உண்டான அத்தனை மீறல்களும், அட்டூழியங்களும் கொடுமையானவை. தந்தை தாயார், தனையன் முன்னிலையிலே பெண்களின் கற்பை சூறையாடுவது, பிறகு தந்தை, தனையன்களின் கை கால்களை வெட்டி எறிவது, அரசு எந்திரங்களை முடுக்கி விமானத்தாக்குதல், அரசின் இராணுவம் கிரமாங்களில் புகுந்து சூரையாடல், அரேபிய 'ஜிஞ்சாவீத்' போராளிகள் குதிரையிலும் ஒட்டகத்திலும் சென்று ஒட்டு மொத்தமாக கிராமத்தையே வளைத்து தீயிட்டு உயிரோடு கொளுத்துதல், தப்பி ஓடும் அப்பாவி ஜனங்களை வானிலிருந்து வெடிகுண்டு வீசி தாக்குதல், கிராமத்தில் உள்ள அனைவரும் தப்பிய உயிருக்கு பயந்து ஓடியபின்னர், அரேபிய 'ஜிஞ்சாவீத்' போராளிகள் கிராமத்தில் உள்ள அத்தனை சொத்துக்களையும் சூறையாடல், தொடர்ந்து தாக்குதல் நடத்தி கடைசியில் தீக்கிரையாக்குதல். இவை அத்தனையும் இந்த பகுதியில் இருந்த கறுப்பர் இனமக்களின் மீது நடந்த அட்டூழியங்கள்!

ஒன்றும் மட்டும் புரிகிறது இதே கொடுமையை அனுபவித்த நம் இலங்கை தமிழ் நெஞ்சங்களை நினைத்து பாருங்கள். யுத்த பூமியில் அழிந்த தமிழ் நெஞ்சங்களை நினைத்து பாருங்கள். இது போன்ற கொடுமைகளை இன்று பார்க்கும் பொழுது அனத்து உலக மக்களும் கொந்தளிக்கின்றனர்! இதெற்கென அமெரிக்க அரசாங்கம் தனியாக சிறப்பு பார்வையிட்டு, இந்த கொடுமைகளுக்காக சங்கை முழக்குகிறது! எங்கே சென்றது இந்த கொடுமைகள் எல்லாம் நம் தமிழ் சகோதரன் அனுபவித்த பொழுது! தான் வாழ்ந்த பூமியில் தன் சொந்தம் பந்தம் வீடு உறவு என அனைத்தும் இழந்து அகதியாய் கூட வாழவிடாமல் துரத்தியடித்தபொழுது எங்கே சென்றது இன்று அறைகூவல் விடுக்கும் உலகம். நம் சகோதரனை காக்க நம் சகோதர புலிகள் இல்லையெனில் எஞ்சி நின்று உரிமையை தட்டிகேட்க முடிந்திருக்குமா! இப்படி வலிமை காட்டவிடின் சொந்த மண்ணிலே இது போன்று அகதிகளாய் நின்று பிறகு மடிந்து போகும் இம்மக்களை நிலைதான் ஏற்பட்டிருக்கும்! யுத்தமில்லா பூமியாய், தான் பிறந்த நாட்டிலே சுதந்திர குடிமகனாய் தன் உரிமை காத்து தனித்து நிற்கும் வேளை எப்பொழுது வரும்!

இது எலெக்ஷன் டைம்!

இந்த தேர்தல் இருக்கே, இது தான் என்னுடய 'Extravert Character' ஐ முதன் முதல்ல வெளிக் கொண்டுவர காரணமா இருந்த ஒன்னு! அப்ப, நான் இரண்டாவதோ இல்ல மூணாவதோ படிச்சிக்கிட்டு இருந்த நேரம். அது பார்லிமெண்டுக்கும், சட்டசபைக்கும் சேர்ந்து நடை பெற்ற தேர்தல்னு நினைக்கிறேன். 1971ல நினைக்கிறேன். அப்ப காங்கிரஸ் பிரிஞ்சு, ஒன்னு இராட்டை சின்னத்தோடயும், இன்னொன்னு பசுகன்று சின்னத்தோடயும் தேர்தல்ல போட்டியிட்ட நேரம். நான் சும்மா எங்க கடைக்கு போயிருந்தப்ப, எங்க கடைக்கு எதிர்த்தாப்பல நல்ல சின்னதா காங்கிரஸ் கட்சி ஆபீஸ், கூரையிலனால மேஞ்ச ஒன்னு, அதில பேப்பர், நோட்டீஸ்னு, அப்புறம் மைக் போட்டு சிவாஜி பாட்டு எல்லாம் போட்டு, அப்ப அப்ப நிறுத்தி மைக்ல பேசி ஓட்டு சேகரிச்சாங்க, அம்மா அய்யா எல்லாரும் ஓட்டை ராட்டை சின்னத்துக்கு போடனும்னு. நான் கொஞ்சம் துறு துறுன்னு இருப்பேன். என்னையை அந்த கட்சி ஆபீஸ்ல கூட்டி வச்சு, மைக்கை கைல கொடுத்து, இந்த மாதிரி நடுவில நடுவில பேச சொல்லி சும்மா உட்காரவச்சுட்டு போய்ட்டாங்க. நானும் சும்மா வீரமா, வளைஞ்சு, நெளிஞ்சு பல குரல்கள்ல பேசி அந்த கடை வட்டாரத்தை ரொம்ப கவர்ந்திழுத்தேன் என் பேச்சால. எல்லா கடைக்காரங்களும், யாரு மைக்கில பேசிறதுன்னு கட்சி ஆபிஸு வரை ஒரு எட்டு வச்சு வந்து பார்த்துட்டு போனாங்க. நம்ம பேச்சுக்கும் நல்ல வரவேற்பு இருந்ததால எலெக்ஷன் முடியும் வரை தினம் வந்து பேச சொல்லி சும்மா சாக்லேட் எல்லாம் வாங்கி கொடுத்து என்னை உற்சாகப்படுத்தினாங்க!

எதுக்கு சொல்ல வரேன்னா, இது நமக்கு தைரியமா எப்படி மேடைகள்ல பேசனும்னு அச்சாரம் போட்டு கொடுத்த நிகழ்ச்சி. அதுக்கப்பறம், இந்த அரசியல், தேர்தல் எல்லாம் கொஞ்சம் ஆர்வத்தோட கவனிக்க காரணம், என்னோடய அண்ணன் ஒருத்தர் அரசியல் இருந்த தால. அதுவும் நான் எம்ஜிஆர் ரசிகன், அவரும் அந்த அதிமுக வில உறுப்பினரா இருந்து நல்ல வளர்ந்த நேரம். அப்புறம் எங்க பெரிய அண்ணன் நல்ல விமரிசகர், எல்லா கட்சிகளையும் நல்லா விமரிசனம் பண்ணக்கூடியவர். அவர் வருவாய் துறையில வேலை செஞ்சதாலே, அரசாங்க சட்ட திட்டங்கள், எப்படி ஏழை பாளையை போய் சேருது,இல்ல எந்த விதமா பாதிக்கிதுன்னு அழகா அப்ப அப்ப எங்க வீட்ல இருக்கிற பெருசுங்க, வர விருந்தாளிங்க கூட கதை அடிச்சிக்கிட்டு இருப்பார். அந்த கதைகளை அங்கன உட்கார்ந்து கேட்கிறதில நமக்கு ஒரு சுவாரசியம்!

அப்பதான் இந்த தேர்தல் சின்னங்கள் பத்தி பேச்சு வந்தப்ப, திமுகவின் புத்திசாலித்தனதை அழகா சொல்லிக்கிட்டிருந்தார், அதாவது தேர்தல் சின்னங்கிறது சரியா படிக்காத பாமரனையும் போய் சேரனும். அதை அவங்களே கட்சி உதவி இல்லாம் வரஞ்சு promote பண்ணனும். அப்படி பட்ட சின்னத்தை தேர்ந்தெடுப்பதில் அண்ணாதுரையின் புத்திசாலித்தனத்தை சொல்லுவாரு. இந்த உதயசூரியன் சின்னம் ரொம்ப ஈஸி, இரண்டு கோடு போட்டு மலையை போட்டுடலாம், பிறகு ஒரு அரை வட்டம் அதுக்கு மேலே ஒளி கோடுகள், எவ்வளவு ஈஸி பாருங்க. அதே மாதிரி எம்ஜிஆரும் தன் கட்சி சின்னத்தை தேர்ந்தெடுத்தப்ப இரட்டை இலை தேர்ந்தெடுத்தார். அதுவும் சுவத்தில வரையறுது ரொம்ப ஈஸி. அதுக்காக இவெங்க சண்டை போட்டு இந்து தேர்தல் சின்னத்தை தேர்தல் ஆணையத்துக்கிட்டருந்து வாங்கினாங்க. மத்தபடி பசுகன்று, பம்பரம், மாம்பழம் அப்படின்னு அதுங்களை வரஞ்சு அவ்வளவு ஈஸியா ஷேட் கொடுத்திட முடியாது எல்லாராலயும்! இன்னும் விஜயகாந்துக்கு சின்னமே கிடைக்கிலன்னு கெள்விபட்டேன். அவரு இதுல கொஞ்ச்ம் புத்திசாலித்தனத்தை கடைபிடிப்பாரன்னு தெரியல்லை! இன்னும் இந்த சின்னங்கள் எத்தனை காலம் இருக்கப்போதோ தெரியல்லை. எப்ப எல்லாருக்கும் படிப்பறிவு வந்து பேரை படிச்சி ஓட்டு போடும் நிலமை எப்போது நம் நாட்டுக்கு வரப்போகுதுன்னு தெரியல்லை!

இந்த எலெக்ஷன்ல சீட்டு வாங்கிறதும் ஒரு பெரிய அரசியல், இதை நான் நேரில இருந்து பார்த்தவன்ங்கிறதால சொல்றேன்! நான் ஏற்கனவே சொன்ன மாதிரி எங்க அண்ணன் அதிமுகவில சேர்ந்து அப்ப முசிறி புத்தன், சோமசுந்திரம் அகியோரோட செல்லப்பிள்ளை மாதிரி இருந்து, கொஞ்சம் வாய்ஸ் உள்ள ஆளா வளர்ந்திருந்த நேரம். அப்ப 1977ல வந்த எலக்ஷன்னு நினைக்கிறேன். திருச்சி ஒன்னு தொகுதில எல்லாரும் எதிர்பார்த்த வேட்பாளர் மதிவாணன் ஒருத்தர், அவருக்குத்தான் 100 சதவீதம் சீட்டுன்னு எல்லாரும் நினனச்சிருந்த நேரம். ஆனா வேட்பாளர் பட்டியல் வந்தப்ப பாத்திரக்கடை வச்சிருந்த மாணிக்கம் என்பவருக்கு எம்ஜிஆர் சீட்டு கொடுத்திட்டாரு! அதுக்கு ஒரே காரணம், மாணிக்கம் கொடுத்த பெரிய பணபொட்டி தான். அது தெரிஞ்சு மாணிக்கத்தை எங்க அண்ணன் அவங்க தோஸ்த்து எல்லாம் மாணிக்கத்தை அடிச்சு பெரிய ரகளையா போயி, கட்சி மேலிடிம் தலையிட்டு, மாணிக்கத்துக்கு வேலை செய்ய சொல்லி எங்க அண்ணனுக்கு உத்திரவு போட்டுட்டாங்க! அவரும் அப்படியே செஞ்சுக்கிட்டிருந்தாரு. ஒரு தடவை எம்ஜிஆர் திருச்சிக்கு பேச வந்தப்ப கூட்டத்தில ஆரம்பிக்க முன்ன சொன்னது, எங்க அண்ணன் பேரை கூப்பிட்டு, அவரை அவரு வண்டியில போயி உட்காரச் சொன்னது தான், அப்புறந்தான் பேச்சை ஆரம்பிச்சு முடிச்சுட்டு போனார். அவரு அடுத்து முசிறி போயி பேசனும், அதுக்குள்ள எங்க அண்ணனுக்கு காருக்குள்ள வச்சு நல்ல பூசை எம்ஜிஆருக்கிட்ட. சும்மா மொத்து மொத்தி அப்புறம் முசிறில இறக்கி விட்டுட்டு, ஒழுங்கா மாணிக்கத்துக்கு வேலை செய்யனும்னு சொல்லிட்டு போயிட்டார். இது நிறைய பேருக்கு தெரியாது ஆனா எங்களுக்கு தெரியும்!

ஆக வேட்பாளர்கள் தேர்வு எப்பவுமே இப்படிதான். பெரும்பாலும் ஓட்டு போடறவங்க, அரசாங்கம் எப்படி நடந்தது போன ஆட்சியிலே, இல்ல அதுக்கு முன்ன ஆட்சி செஞ்சவங்க என்னா செஞ்சாங்கன்னு தீர ஆராஞ்சு அதுக்கு தகுந்த மாதிரி ஓட்டு போடறதில்லை. எல்லாமே எதோ அந்த நேரத்தில கிடைச்ச ஆதாயம், பிறகு தன் கூட இருக்கிற சொந்தபந்தங்கள் ஏதோ ஒரு வகையில எந்த கட்சி வேட்பாளருக்கு ஓட்டு போட சொல்லி வற்புறுத்திவதால போடும் ஓட்டுகள் தான். ஒரு தடவை என் தந்தை ஓட்டு போட்டுட்டு வந்து சொன்னாரு, அந்த வேட்பாளர் படிச்சது B.E., அது நீ படிச்ச படிப்பு அதுனால நான் ஒட்டு போட்டேன்னு! இது போல கல்வியை பார்த்து போட எத்தனை பேரு முன்வருவாங்க. அவருக்கு படிச்சவங்க நல்லது செய்வாங்கன்னு மனசுல தோண்றமாதிரி எத்தனை பேருக்குத் தோணும்! அப்படியே இல்லனாலும் நம்மல மாதிரி படிச்சவங்க ஆராஞ்சு நல்ல வேட்பாளர்களை நம்ம வீடு பெரியவங்களுக்கு வழிகாட்டலாம். அப்படியே செய்யலாமுன்னு இந்த கட்சி அறிக்கைகள்(Manifesto) பார்த்து அப்படியே கொஞ்சம் மத்த விஷயங்களையும் பீராயலாமுன்னு பார்த்தா சோகந்தான் போங்க!

இந்தோ தமிழ்நாடு அரசாங்க web siteல தமிழக நிதி நிலமை அஞ்சு வருஷத்துக்கு முன்ன இருந்ததுக்கும்(White Paper on Tamil Nadu Government's Finances), இப்ப இடைக்கால வரவு செலவு திட்டத்தில அறிவிச்சிருக்கிற முன்னேற்றத்தையும்(இந்த அரசாங்கம் செஞ்சதா சொல்றதை)விமரிசச்சு, திமுக, அதிமுக கூட்டனிகளை தெளிவா சொல்ல நம்ம ப்ளாக்கருங்க யாரும் முன் வரல்லையே. நாமலும் சுட சுட கவர்ச்சி செய்திகளை தானே இந்த ஊடகத்திலை போட்டுக்கிட்டு இருக்கோம்! அழகா தேர்தல் 2006 ன்னு ஒரு தனி வகைப்பிரிவு தமிழ்மணத்தில வந்தாலும், இந்த மாதிரி இதை அழகா விமரிசனம் யாரும் இன்னும் பண்ணவே இல்லை! ஒரு கட்சியில சொலற மாதிரி 2 ரூவாக்கி அரிசி , இலவச டிவி, இலவச மின்சாரம் துணி நெய்றவங்களுக்கு(ஏற்கனவே விவசாயத்துக்கு கொடுக்கிறது எங்க போகுதுன்னு தெரியல்லை), இலவச கேஸ் அடுப்பு, இது எல்லாம் சாதரண படிக்காத மக்களை கவரும் எலெக்ஷன் அறிக்கைகள். இன்னும் எத்தனை காலத்துக்கு இதையே சொல்லிக்கிட்டு திரியப்போறாங்களோ! அப்புறம் இலவசமா 2 ஏக்கர் நிலம், இருக்கிற தமிழக பூமில விலைநிலங்கள் ஒரு 21 சதவீதம் தான் அரசாங்க கணக்குப்படி. எந்த நிலத்தை பட்டா போட்டு எங்க கொடுக்கப்போறங்கன்னு தெரியல்லை! மேற்கொண்டு தமிழக அரசு web siteல இருக்கிற எல்லா ரிப்போர்ட்டும் படிச்சி கொஞ்சம் ஆராயலாமுன்னு பார்த்தா, எல்லாம் அரதப்பழசு, அதுவும் 'Tamil Nadu - An Economic Appraisal 1999-2000' படிச்சா அஞ்சு வருஷ முன்னாடி கணக்கு. என்னத்தை மக்கள் படிச்சு, என்ன நிலைமையை தெரிஞ்சுக்க போறங்கன்னு ஒன்னும் தெரியல்லை!

கடைசியில இந்த எலெக்ஷன்ல என்னதான் நடக்கிதுன்னு பார்க்கப்போனா, கவர்ச்சியா சிம்ரன், விந்தியா, கோவை சரளா மேடையில பேசற படங்கள் போட்டு ஜாலியா வச்சிருக்காங்க! அவ்வளவுதான்! இன்னய தேதிக்கு வளர்ந்து வரும் தொழில்நுட்பங்க இந்த மாதிரி ஏழைபாளைங்களை முன்னேத்த எங்கயோ போய்கிட்டிருக்கு. ஈத்தோப்பியாவில மக்களை நேரிடையா பேட்டி கண்டு, அங்க உள்ள கஷ்ட நஷ்டங்களை எடுத்தி சொல்லி up to date ஆ BBC website ல பதிவு பண்ணி, இந்த ஆப்பிரிக்க உதவி தொகைகள் ஒழுங்கா எப்படி போய் சேரணும்ங்கிறதுக்கு வழி வகை செய்றாங்க! அதையும் அழகா Blog பண்ணி விமரிசனம் செஞ்சு விழிப்பூட்டிகிட்டுருக்காங்க. வேணும்னா இந்த சுட்டியில போய் பாருங்க! நம்மலும் இந்த மாதிரி மக்களை நேரில் கண்டு ஆட்சி செஞ்சவங்க குறை நிறைகளை சொல்லி விழிப்புணர்வை ஏற்படுத்தும் 'Journalism' நம்மூர்லயும் வராதா????

அமெரிக்க முதலாளித்தவமும் வந்தேறிகுடிகளும்!

அமெரிக்கா வந்து இறங்கினோன, எல்லாமே ஒரு புதிய உலகமா தெரியும். அது கனடாவா இருந்தாலும் சரி, இல்ல யூஎஸ்ஸா இருந்தாலும் சரி. ஆனா இன்னு ஒரு உண்மை பளிச்சுன்னு தெரியவரும், அதாவது நம்ம ரொம்ப எகத்தாளமா சொல்லிக்கிட்டுத் திரிவோமே, 'மண் தோன்றி கல் தோன்றாமுன் பிறந்த மூத்தக்குடி தமிழ்குடின்னு', அந்த மாதிரி சொல்லிக்கிட்டு திறியவரங்க எவனும் இங்கே கிடையாது. அதாவது எல்லோருமே, இந்த பூமிக்கு பொழைக்க வந்தவுங்க. தாங்கள் சமய ரீதியாவோ, இல்ல கொடுங்கோலர்களின் ஆட்சியில் இழைக்கப்பட கொடுமையிலிருந்தோ தப்பிக்கவோ, இல்லை பஞ்சம் பட்டனியை விட்டுட்டு நல்லதொரு வாழ்க்கை வாழவோ வந்தவங்க. ஏன்னா இந்த பூமியிலே அப்ப அந்த மாதிரி சாதி சமய கொடுமைகளோ, இல்ல கொடுங்கோலன்களோ ஆட்சி புரியலை, இது ஒரு இந்திரபுரியாவும் சுததந்திரபுரியாவும் தான் இருந்தது. வற்றாத வளம் கொண்ட அனைத்து பூமி செல்வங்களையும் கொண்டிருந்திச்சு, இந்த பூமி.

ஒரு 500 வருஷத்துக்கு முன்னே, பூமியோட இன்னொரு பக்கத்தை யாருமே பார்க்கல. நம்ம கதையில படிச்சிருப்போமே ஏழு மலைகள் ஏழு சமுத்தரம் கடந்து போய் அதிசயமான உயிர் நிலையை எடுத்துட்டு வர ஹீரோ போயிட்டு வருவாருன்னு, அத கடந்து போறதுக்குள்ள என்னன்ன பிரளயங்களை சந்திக்க வேண்டியிருக்குமுன்னு. அப்படித்தான் ஒரு 1000 வருஷத்துக்கு முன்னே, இந்த உலகத்திலே ஒரு பகுதியில இருந்தவங்களுக்கு, இன்னெரு பகுதியும் ஒன்னு இருக்குன்னு தெரியாம இருந்திச்சாம்! அந்த காலகட்டங்கள்ல திக்கு திசை எதுவும் தெரிஞ்சிக்கிட அறிவையும் பெறல, சாதனங்களும் இல்லை, எதோ போய்பார்ப்போமுன்னு கடல்ல படகு கட்டி ஓட்டி, வடக்கால ஆர்டிக் பக்கத்தில கடல் பிராயாணம் செஞ்சவங்க, 'வைக்கிங்'கிற கூட்டம், நார்வே, சுவீடன் பக்கத்திலன்னு நம்ம சரித்திரம் படிச்சமில்ல! அவங்க கடல்ல மீன்கள் பிடிக்க இந்த அமெரிக்க கரை வர வந்து, திரும்ப போய்ட்டாங்களாம். அப்புறம் கட்டுமரக்கப்பல்கள்ல, அட்லாண்டிக் சமுத்திரத்தில பிராயணம் செஞ்சு, இந்தியா போக ஆசைப்பட்டு, கடைசியிலே மேக்கால போயி தான் கண்டுபிடிச்ச நிலபரப்பை, இந்தியான்னு சொன்ன கொலம்பஸ் பத்தியும் தெரியும்.(இதல விஷேஷம் ஒன்னு தெரியுமா, இப்ப நம்ம அமெரிக்க மோகம் கொண்டு இங்க வந்துபுடனும்னு துடிச்ச மாதிரி, அப்ப ஐரோப்பாவின் குளிர் பிரதேசத்தில இருந்தவெனல்லாம் நம்ம இந்தியாக்கு வந்துப்புடனும் அலைஞ்சாங்களாம். ஏன்னா உரப்பா சாப்பிடறதுக்கு உண்டான விளைபயிர் நம்ம நாட்லதான் கிடைச்சுச்சாம், பிறகு மற்ற வளம் நிறைஞ்சு செழிப்பா இருந்திச்சாம், இன்னும் ஒரு 100 வருஷம் கழிச்சு இந்த சைக்கிள் திரும்பமா, இந்த வெள்ளக்கார பசங்க நம்மூர் வர ஆசைபபடுவாங்களாம், 'கறுப்புதான் எனக்கு புடிச்ச கலரு'ன்னு பாடபோறாங்கெளாம்! 'சரியா'ன்னு விவரம் தெரிஞ்சவங்க சொல்லுங்களேன்!) அப்படி கண்டுபிடிச்ச கண்டம் இது! அதுக்குப்புறம் மேற்கு ஐரோப்பிய நாடுகள் இங்கிலாந்து, ஸ்பெயின், போர்ச்சுக்கல் அப்படின்னு ஓன்னு ஓன்னா இந்த வட தென் அமெரிக்க கண்டத்தை கூறு போட்டு அவங்க சந்ததியினரால உருவாகி நிக்கிற நாடுகள்தான் அனைத்து வட தென் அமெரிக்க நாடுகள்.

இதில படைபலம் கொண்ட ஆங்கிலேயர்கள், அதிகம் பிடிச்ச பகுதி தான் இந்த வட அமெரிக்க பகுதி, அதிலேயும் முதல்ல ஆதிக்கம் செலுத்தின பிரன்சு காலனிகளை காலி பண்ணிட்டு எல்லா பகுதியையும் தங்கள் கட்டுபாட்டுக்கு கொண்டு வந்தவங்க தான் இந்த ஆங்கிலேயர்கள். அதிகமா மதம் பரப்ப வந்த ஸ்பேனியர்ட்ஸ்ங்கிற ஸ்பெயின் நாட்டினரை தெக்கால ஓட விரட்டிட்டு, அவங்க வசம் இருந்த வட மேற்கு, மேற்கு அமெரிக்க பகுதிகளை புடிச்சு போட்டுட்டு, இப்ப அந்த தெக்கால இருந்து வந்து பொழக்க வந்தவங்க, அதாவது மதில் சுவர் ஏறி குதிச்சு ஓடி வந்தவங்களை நாடுவிட்ட துரத்த, அவங்க ஜீவனாம்சத்துக்கு பெரிய இடைஞ்சலா, இன்னெக்கு ஆர்ப்பட்டம் நடத்திக்கிட்டிருக்கிற இந்த 'Immigration Bill', குடியேறு சட்டம் என்னா அதுனால நம்ம ஊர்லருந்த வர மக்களுக்கும் என்னா துன்பங்கள்ன்னு கொஞ்சம் சொல்லலாமேன்னு தான் இந்த பதிவே!

அதுக்கு முன்ன தலைப்பிலே இருந்த முத பாதியை பார்ப்போம். முதலாளித்தவம் பத்தி உங்களுக்குத் தான் தெரியுமே! அதாவது எந்த ஒரு பொருளோட உற்பத்தியோ, இல்லை எந்த ஒரு சேவையோ யாருவேனாலும் செய்யலாம், அதாவது காசு இருந்தா! இதுக்குன்னு அரசாங்கம் எல்லாத்தையும் தான் கையில எடுத்துக்கிட்டு ஒன்னும் செய்யாது எல்லாமே சப்ளே டிமாண்டு கணக்குப்படி, அதவச்சுத்தான் எல்லாத்தோட விலைகளும் நிர்ணயம். அதாவது அரசாங்க கோட்டா, விலை நிர்ணயம்ங்கிற கதையே கிடையாது. உதாரணத்துக்கு சொல்னும்னா, இந்த பெட்ரோல் விலையை நம்ம நாட்ல எடுத்துக்குங்க, அரசாங்கம் நிர்ணயக்கிற விலையில தான் பெட்ரோல் கம்பனிங்க வித்தாவனும், அதுக்குப்பேரு அட்மினிஷேட்ரிவ் ப்ரைஸிங் மெக்கானிசம், இதை நம்ம சிதம்பரம் ஏற்கனவே எடுத்த போட்டுட்டு, மார்க்கெட்டு விலைக்கு இனி பெட்ரோல் விக்கனும்னு 1998ல் திட்டம் போட்டு 2002ல அமுல் படுத்தனாலும் அது சும்மா பேருக்குத்தான் ஓடிக்கிட்டு இருக்கு, இப்பயும் அரசின் ஆளுமை இருந்துக்கிட்டு இருக்கு, ஏன்னா கிருஷ்ணாயில் விலை ஏறி, அப்புறம் ஆட்சி கவுந்துடும்னு, இதில நிறைய சூட்சமங்கள் இருக்கு, அதாவது அரசியல் ஈடுபாடு(ஓட்டு வங்கிக்காக), அப்புறம் ப்ரைஸ் சென்சிட்டிவ்னு ஏழைபாளையை ரொம்ப பாதிக்கும் விஷ்யம்ங்கிறாதால எதிர்பார்த்த மாதிரி இந்த மாற்றுமுறையை (De-regulation)ஐ நம்மலால செயல்படுத்த முடியல. (இதுநாள அந்த கம்பெனிங்களுக்கு வரும் நட்டம், இத பத்தி அப்புறம் ஒரு பதிவு விரிவா போடலாம்).

ஆனா இந்த பிரச்சனை எதுவும் இல்லாத (நான் சொன்னது, பிரச்சனைங்கிறது, ஸோசியலிஸம், சமத்துவம்) முறை தான் இந்த முதலாளித்தவும். அதுக்குன்னு எல்லாத்தையும் அமெரிக்கா அரசாங்கம் விட்டுடறதில்லை, இந்த பேங்கல கடன்வட்டி இருக்கே (prime lending rate) அதை நிர்மாணிச்சு பணவீக்கத்தை சரி பண்ணிகுவாங்க. இதுவும் நம்ம ஊர்ல இருக்கு ஆனா கிச்சடி மாதிரி நம்மக்கிட்ட எல்லா கொள்கையும் இருக்கு, அதாவது கேப்டலிஸம், ஸோசலிஸம் அப்புறம் கொஞ்சம் கம்யூனிசம். எல்லாமே. ஆனா இங்க முழுக்க முழுக்க முதாலளித்துவம்தான்! மொத்ததில சொல்னும்னா சப்ளே டிமாண்டை, ப்ரீ மார்க்கட் எக்னாமின்னும், இந்த பேங்க் இன்வெஸ்ட்மெண்ட், இன்டெரஸ்ட், பங்கு சந்தை, பாண்டு, மியூட்சுவல் ஃபண்டு, இத்யாதி, இத்யாதி.. இப்படி சொல்லிக்கிட்டே போலாம். இப்ப கொஞ்ச காலமா நாம குளோபலைஷேசன்னு இதைத்தான் செஞ்சுக்கிட்டு இருக்கும். (இதை தர்க்கம் பண்ண ஒரு கும்பல் இருக்கு, நம்ம நாட்டுக்கு நல்லதா, இல்லையான்னு, நான் அந்த சர்ச்சைக்கு போகல்லை, just, முதலாளித்தவம் பத்தி விளக்க இது தேவை பட்டுச்சு, அவ்வளவுதான்!) அடுத்து நம்ம எடுத்துக்கிட்ட பதிவோட மையக் கருத்துக்கு போவோம்!

நியுயார்க் நீங்க போயிருந்தா அந்த டார்ச்சு லைட்டை கையில தூக்கிக்கிட்டு அமெரிக்க சுதந்திர தேவி சிலை பார்க்க போயிருப்பீங்க. அப்பிடி போகதவங்க சினிமால நிறைய பார்த்திருப்பீங்க, அப்பிடியும் பார்க்கலைன்ன 'வேட்டையாடு விளையாடு' ன்னு கமல் படம் ஒன்னு வரும் பாருங்க! அது இருக்கிற எல்லீஸ் ஐலேண்ட்ல இருக்கிற மியூசத்துக்கு போனா உங்களுக்கு அந்த காலத்தில அமெரிக்க பொழைக்க வந்த குடியேறிகளை பத்தியும், அப்ப அவங்களை நாட்டுக்குள்ள விட என்னன்ன பரிசோதனை செஞ்சாங்கன்னு பார்க்கலாம். அதாவது 1900த்திலருந்து 1950 வரை அந்த எல்லிஸ் தீவில தான் கொண்டுவந்து விடுவாங்களாம். அதாவது அப்ப ரொம்ப வறுமையிலும் அரசன், சர்வாதிகாரிகள் கொடுமையிலிருந்தும் தப்பிக்க இத்தாலி, ருமேனியா, சோவியத் குடியரசு நாடுகள், முக்கியமா கிழக்கு ஐரோப்பிய நாடுகள்லருந்து அகதியா வந்தவங்கதான் இன்னெக்கு அமெரிக்காவில இருக்கிற குடிமகன்கள். அதுக்கு முன்னே ஆங்கிலேய காலனி ஆதிக்கத்தில வாழ்ந்தவங்க எல்லாம் இங்கிலாந்து, பிரான்ஸ், ஜெர்மனி நாட்டினர் அவங்க வந்து நிர்மாணிச்ச நகரங்கள் தான் இந்த நியுயார்க், நியு ஜெர்ஸி எல்லாம். சரித்திரம் தெரியனும்னா நிறைய சுட்டிகள் இருக்கு இணையத்திலே. இந்த மாதிரி வந்தவங்க எல்லாம் முறையா, சட்டபடி குடிமகனாகி, இன்னெக்கு 98 சதவீத ஜனத்தொகை அமெரிக்காவில வந்தேறி குடிகள் தான், அவங்க வழி வந்த சந்ததிகள் தான்!(நம்ம நாட்ல இருந்து வந்து குடியுரிமை பெற்றவர்களும் இதில அடக்கம்) இதில ஒரு சோகம் என்ன தெரியுமா, இது மாதிரி வந்தேறிகுடிகளுக்கு முன்னேமே இந்த பூமியில வாழ்ந்த சிவப்பிந்தியர்கள், அதாவது அவர்களை அமெரிக்கன் இண்டியன்ஸ்னு அழைப்பாங்க, நம்ம எல்லாம் 'ஈஸ்ட் இண்டியன்ஸ்', அவங்களுக்கு குடியுரிமை வழங்கப்பட்டதே, 1925க்கு அப்பறம் தான்! (நல்ல வேளை, ஆங்கிலேயர்கள் வந்து அரசாண்டாலும், அவங்களா பார்த்து நமக்கு குடியுரிமை தரும் நிலை ஏற்படல, நாம கொடுத்து வச்சவங்க!)

அப்புறம் தொடர்ந்து, அமெரிக்காவின் பொருளாதர வளர்ச்சிக்கு என்னைக்குமே ஆளுங்க தேவைப்பட்டாங்க. அதனால தொடர்ந்து அமெரிக்க அரசாங்கம் வெளிநாட்டவர்களை இங்கு வந்து குடியேற அனுமதிச்சு, அவங்களும் குடியேறினார்கள். அப்படி நம் நாட்டவரும் 1960க்கு அப்புறம் கல்வி கொடுத்த செலவத்தால நிறைய பேர் இங்கு வந்து குடியேறி சமூகத்தின் உயர்மட்ட நிலைகள்ல இருந்துக்கிட்டிருக்கோம் நாம! அதாவது நாம் எப்பவுமே லேபர் கிளாஸ் கிடையாது. நம்ம ஏன் இந்த புது உலகத்துக்கு அந்தகாலத்தில வரமுயற்சிக்கல்ல? ஆசியாவிலருந்து சைனாகாரனும் ஜப்பான்காரனும் மற்ற பலபேரு கணிசமா 1900களிலேயே வந்தப்ப, நம்ம ஏன் அதிகமா இந்த புது உலகத்து சொத்தோ வசதிகளோ தேடி வரலை. அதற்கான காரணங்கள் பல இருக்கு. சுவாரசியமா படிக்குனும்னா, இதோ சுட்டி

சரி இவெங்கெ எல்லாத்தையும் ஒட்டு மொத்தமா இம்மிகிரண்ட்ஸ் அப்படின்னு சொல்லிடுவாங்க. அமெரிக்காவின் பக்கத்து நாடான மெக்ஸிக்கோவில, நம்ம ஊரு மாதிரி கொஞ்சம் அடிதடி. அதாவது அமெரிக்க மாதிரி சொகுசான வாழ்க்கை கிடையாது. மேற்கொண்டு நல்லா உழைச்சு சாப்பிட போதுமான சந்தர்ப்பங்களை உண்டாக்கி கொடுக்கல்லை அந்த நாட்டு அரசாங்கம். அதனால அங்கிருந்த மக்கள் பக்கத்து நாடான அமெரிக்காவிக்கு சட்ட விரோதமா பொழப்பு தேடி வந்துட்டாங்க. நம்ம ஊர்ல சொல்லுவோமே கள்ளத்தோணி ஏறி. அது மாதிரி சமுத்திரம் கடக்கவேணாம். நிலபரப்பு எல்லையை கடந்தாலே போதும். அப்படி அந்நாட்டு எல்லையிலே இருக்கிற அமெரிக்க மாகாணங்கள், கலிஃபோர்னியா, நியூ மெக்ஸிக்கோ, டெக்ஸாஸ், அரிசோனான்னு அப்படியே ஊடுருவி நியுயார்க், பிலடால்பியான்னு கிழக்கு மாகணங்கள் வரை போய்ட்டாங்க. அப்படி போயி பத்து வருஷ காலத்துக்கு மேலே இங்கேயே தங்கி வசிச்சி வராங்க. இவங்க முழுக்க முழுக்க லேபர் கிளாஸ். அதிகமா திராட்சை தோட்டங்கள்ல வேலை செய்றவங்க, அப்புறம் எல்லா பளுவான வேலை பார்க்கும் தொழிலாளர்கள்! அவங்க குடும்பம், குழந்தைங்களோட இங்கேயே செட்லாயிட்டாங்க. இவங்கதான் இப்ப அண்டாக்குமென்டட் இம்மிகிரண்ட்ஸ்ன்னு அமெரிக்க அரசாங்கம் குறிவச்சு, அவங்கள வெளியேத்த போட போற சட்டம் தான் இந்த 'இம்மிகிரேஷன் பில்'

எதுனால இந்த சட்டம்னு நீங்க கேட்கிறது புரியுது. அதாவது இங்க குடியிரிமை வாங்கறது குதிரை கொம்பு. அதாவது எல்லாருமே வரவங்க எதாவது வேலை மேல வரணும். அப்புறம் அவனுக்கு வேலை கொடுக்கிற கம்பெனி, இவன் இந்த அமெரிக்க கம்பெனிக்கு முக்கியமா வேணும் அப்படின்னு சிபாரிசு செஞ்சா, உங்களுக்கு கிரீன் கார்டுன்னு, அதாவது பச்சை அட்டை. அப்புறம் அஞ்சு ஆறு வருஷம கழிச்சு, நான் இவ்வளவு நாள் அரசாங்கத்துக்கு வரி கட்டி இருக்கிறேன். என்னுடய வாழ்க்கை இனி திடமா இங்க அமெஞ்சுடும், அதனால எனக்கு குடி யுரிமை கொடுங்கன்னு அப்ளிகேஷன் போட்டு அதுக்கப்பறம் பரீசலணை பண்ணி கொடுக்கப்படுவது இந்த குடியுரிமை. ஆனா கள்ளத்தோணியில வந்த அந்த அன் டாக்குமெண்டட் இம்மிகிரண்ட்ஸ், வரி வட்டி எதுவும் கட்டிறதில்லை. ஏன்னா அவன் வந்ததே கள்ளத்தனம். அவன் பொழப்பு சம்பார்த்தியதை சொல்றதுக்கு வாய்ப்பு இல்லை இதுனால. அதனால அரசாங்க வருமானம் இல்லை. ஆனா ஏதோ ஒரு விதத்தில மனிதாபிமானத்தில இந்த குழந்தைங்க படிப்பு, மருத்துவம்னு செலவ செய்ய வேண்டி இருக்கு (இதுக்கு பலத்த எதிர்ப்பு இருக்கு இங்கே உள்ள குடிமகங்கிட்ட). ஆனா, இந்த தொழிலாளர் கூட்டத்தால சில முதாலாளிக் கூட்டத்துக்கு லாபம். எப்படின்னு கேளுங்க. இங்கே பிறந்த குடிமகனை போட்டு வேலை செஞ்சா, அதிகம் சம்பளம் கொடுக்கனும், ஆனா திருட்டுத்தனமா வந்தவன் எவ்வளவு கொடுத்தாலும் வாங்கிட்டு போயிடுவான். அதனால குறஞ்ச சம்பளத்தில ஆளுங்க வேலைக்கு கிடைக்கிறாங்க. இதனால அந்த நிலையிலே இருந்தா இந்த முதாலளிகளுக்கு சாதகம். அதனால உள்ளுக்குள்ளயே அரசியல். எப்படின்னா இங்கேயே பொறந்து படிச்ச புள்ளங்கங்க, ஹை-ஸ்கூல் தாண்டாதவங்களுக்கு, அந்த சின்ன சின்ன வேலை வாய்ப்புகள் போய்டுங்கிற பயம். ஆக இதினால பாதிப்பு உண்டும்னும், அவங்களை சட்டபடி தங்க அனுமதிச்சா, சில பொருளாதார பலன்கள் வருமுன்னும் இங்க இரண்டு பங்கா பிரிஞ்சு சண்டை போட்டுகிட்டிருக்காங்க!

பில் இப்ப செனட்டுக்கிட்ட இருக்கு, அம்சம் என்னான்னா, அப்பா, நீங்க எல்லாம் சட்டபடி அமெரிக்காகுள்ள வரலை, ஆனா பரவாயில்லை, நீங்களா வந்து ஒரு 1000 டாலர் ஃபைன் கட்டிட்டு பதிஞ்சுடுங்க, உங்களுக்கு மூணு வருஷம் தங்க அனுமதிக்கறோம், அப்புறம் உங்க நாட்டுக்கு போய்ட்டு திருப்பி ஒரு வருஷம் கழிச்சு வாங்க, பிறகு மூணு வருஷம், அப்புறம் சில வருஷங்கள் கழிச்சு, நீங்க ஒழுங்க வரிகட்டி, இங்கிலீஷ் எழுத படிக்க தெரிஞ்சு, அமெரிக்க அரசியல் சாசன முறை எல்லாம் தெரிஞ்சா உங்களுக்கு குடி உரிமை கொடுக்கிறோம். அதுவும் வருஷத்துக்கு இவ்வளவு கோட்டான்னு!

ஆனா அந்த மாதிரி வந்தேறிய குடியேறிகள், இந்த பத்து பதினைஞ்சு வருஷத்தில இங்க வாழ்ந்து எல்லாம் சொந்தம் பந்தம் அகி போனதால இதல்லாம் ஒன்னு பண்ணாம, எங்களுக்கு அமெரிக்க குடியுரிமை வழங்குன்னு போராட்டம் நடத்திகிட்டிருக்காங்க. இதில நம்மல மாதிரி வந்து போற ஆளுங்களுக்கும் பாதிப்புகள் வரலாம். அதுவும் 9/11 பிறகு,இப்ப இருக்கிற கெடுபிடியில, நம்ம ஆளுங்க வரது கம்மியாயி போயிடுச்சி, அப்புறம் அப்படியே வந்து கிரீன் கார்டு வாங்கனாலும், கல்யாணம் பண்ணி பொண்டாட்டி, புள்ளைகளோட சேர்ந்து வாழமுடியாம எத்தனையோ பேரு இந்த அமெரிக்க கனவுகள்ல வந்து கஷ்ட படுறாங்க. திரும்பவும் இந்தியா போயிடறாங்க. இன்னமும் 'Land of Opportunity'ன்னு அழைக்கப் பட்டு அமெரிக்க கனவுகளோட வரதுடிக்கும் இளைஞர்கள்க்கு இந்த கனவுக் கோட்டைக்கு வரது ரொம்ப கஷ்டம். ஆனா மாறி வரும் சூழல்ல நம் தாயகமே நல்ல வாய்ப்புகளை ஏற்படுத்தி கொடுத்துக்கிட்டு இருக்குங்கிறதும் மறக்க முடியாத உண்மை!

இந்திய அமெரிக்க அணு ஒப்பந்தம் - ஓர் ஆராய்வு

இந்தியா எப்பொழுதும் இல்லாத வகையில் இப்பொழுது மிக வேகமாக மாறி வருகிறது இந்த உலக அரங்கில். இந்த அமெரிக்க-இந்திய அணுசக்தி ஒப்பந்தம், மார்ச்சு 2ம் தேதி கையெழுத்திடப்பட்ட, இரு சாரார் ஒப்பந்ததை சற்றே நீங்கள் கூர்ந்து கவனித்தால், பல உண்மைகள் விளங்கும். இந்த பன்னாட்டு அரசியலில், யாரும் யாருக்கும் அனுகூலம் செய்துவிடுவதில்லை, இந்தியாவிற்கும் இதனால் மிகப்பெரிய அரசியல் அனுகூலம் ஏற்பட்டுவிடவில்லை, இந்த ஒப்பந்தத்தால். உண்மையில் பார்த்தால், இந்த ஒப்பந்தத்தினால், அமெரிக்காவிற்கு தான் இலாபம் ஏற்பட்டுள்ளது, ஆச்சிரியப்படவேண்டாம், இதைப் பற்றி விரிவாக கீழே பார்க்கலாம்.!

இந்த ஒப்பந்தினால் ஏற்படக்கூடிய விளைவுகள், அமெரிக்காவிற்கு, அதன் பொருளாதாரத்திற்கும், மற்றும் அதன் வெளியுறவு கொள்கைக்கும் மிக அதிகம். அமெரிக்க அதிபர், ஜார்ஜ் புஷ் அவர்களின் இந்திய விஜயம், அதுவும் இந்திய வர்த்தக கல்லூரிகளுக்கு சென்றதையும், மற்றும், அவர் நடத்திய சம்பாஷனைகள் இந்திய விவாசயத்துறை விஞ்ஞானிகளோடு, மற்றும் விவசாயிகளுடன் நடத்திய பரிபாஷையின் அர்த்தம், உங்களுக்கு ஏதோ, வல்லரசின் அதிபர், நம் கடைகுடிமகனுடன் காட்டிய ஆர்வத்தினை பார்த்து, நீங்கள் புளகாங்கிதம் அடைந்தால், அதன் பின்னனி என்ன என்பதை சற்றே உள்நேக்கிப்பார்த்தால், மிகப்பெரிய உண்மை விளங்கும்.

நம்முடய 'மிடில் கிளாஸ்' என்று அழைக்கப்படும் நடுத்தர குடும்பங்களின் எண்ணிக்கை எவ்வளவு தெரியுமா? National Council of Applied Economic Researc (NCAER) என்றழைக்கப்படும் நிறுவனக் கணக்குப்படி, அது 5.7 கோடி, 2001-02ம் ஆண்டுகளில், அதுவே 9.2 கோடியாக உயர்ந்துள்ளது இந்த 2005-06 களில், மேற்கொண்டு, அது 15.3 கோடிகளை வரும் 2009-10களில் தொட்டுவிடும். இதன் அர்த்தம் என்னவென்று தெரியுமா, இந்த குடும்பங்கள் தான் நாம் கொண்டாட போகிற பொருளாதார வளர்ச்சிக்கு முக்கிய காரணகர்த்தா. புரியவில்லை?

உங்கள் அனைவருக்குமே தெரிந்த ஒன்னு கொடுத்தல், வாங்கல், அதாவது பணம் புழக்கம், என்பது, வருமானம், செலவீனத்தை பொறுத்ததே, இது தான் பொருளாதார வளர்ச்சியின் அடிப்படை. அதை செய்யப் போகிற அந்த கர்த்தாக்கள் தான் நான் மேலே கூறிய அந்த நடுத்தரக் குடும்பங்கள். அதாவது 'Consumer Goods Sector' என்ற துறையின் வளர்ச்சி 3.4 சதவீதத்திலிருந்து, 2004களின் கணக்குப்படி, 5-6 சதவீத வளர்ச்சி, இந்த 2004-05 களில் உயர்ந்துள்ளது. அதே போல் தொழில் துறை, இந்த வருட கால் ஆண்டின் வளர்ச்சி அதற்குள்ளாக 8.4 சதவீதம் ஏற்பட்டுள்ளது, இது போன பத்தாண்டுகளுக்கு முன்னே அடைந்த ஒன்று. அதே போல, வெளி நாட்டு மூலதனம் நமது பங்கு சந்தையில், 10m பில்லியன் அமெரிக்க டாலர்களில் உயர்ந்துள்ளது. இதெல்லாம் நமது அதிவேக பொருளாதார வளர்ச்சியை கோடிட்டுக் காட்டுகிறது. இந்த அசுர வளர்ச்சியினால், வெளிநாட்டு மூலதனம், விவசாயம், மருத்துவம், உணவு தயாரிப்பு என்று பல்வேறு துறைகளிலும் வந்தவண்ணம் இருக்கிறது. அதுவும் அமெரிக்க கம்பெனிகள், இந்திய பொருளாதார வளர்ச்சியைக் கண்டு, முதலீட்டை செய்தவண்ணம் இருக்கின்றனர். அவர்களை பொருத்தவரை எந்த நாட்டிலே அதிக லாபம் ஈட்ட முடியுமோ அதிலே காசுக் கொட்ட தயாராக இருக்கிறார்கள். அதுவும் பாதுகாப்பான மூலதனத்துக்கு, இந்திய சட்டங்கள் வழிவகுப்பதால், இங்கே காசை கொட்ட அவர்கள் தயாராக உள்ளார்கள். இது தான் அமெரிக்க அரசியல்வாதிகளுக்கு ஏற்பட்ட முதல் பொறி.

இந்த அசுர வளர்ச்சி, இந்தியாவை எங்கு கொண்டுவிடும் என்று எண்ணுகிறீர்கள்? முதலில் அமெரிக்காவின் கச்சா எண்ணைய் மற்றும் எரிவாயுவில் அவர்கள் கொண்டுள்ள உலக ஆளுமைக்கு முதலில் ஆப்பு வைக்கும். புரியவில்லையா?. நாம் அவர்களை இச்சக்திகளுக்கு எதிர்கொள்ளப் போகும் மிகப்பெரிய சக்தி! எப்படி. இந்த கச்சா எண்ணைய் மற்றும் எரிவாயுவின் தேவை, வளர்ந்து வரும் பொருளாதார நாடுகளான, அமெரிக்கா, சைனா, இந்தியாவால் பலமடங்காக அதிகரிக்கும் போக்கும், ஸ்திரதன்மை இழந்த மத்திய ஆசிய நாடுகளின் போக்கும், தங்கு தடையின்றி கிடைத்த இந்த சக்தி, அமெரிக்காவின் ஆளுமை, மற்றும் அவர்களின் ஆடம்பர வாழ்க்கையை, கொஞ்சம் ஆட்டம் காண வைக்கப் போவதால், உள்நாட்டு கொள்கையாக, 'Advance Energy Initiative' என்று மாற்று வழி சக்தி ஆராய ஏகப்பட்ட பணத்தை கொட்டி ஆராய்ச்சியை முடிக்கிவிட்டுள்ளது.(இதைப் பற்றி, நான் ஏற்கனவே ,'வேண்டும் ஒரு புதிய ஷக்தி' என்ற பதிவு இட்டுருந்தேன், சற்றே அதை பார்க்கவும், விவரம் புரியும்!)

அவர்களின் வெளிநாட்டுக் கொள்கையாக, இந்த எண்ணைய் சக்தியை நாடும் இந்தியாவிற்கு மாற்று சக்தியான அணு சக்தி தொழில்நுட்பங்களை தங்கு தடையின்றி தருவதின் மூலம், நமது எண்ணைய் சக்தியின் தேவைகளை கொஞ்சம் இதன் மூலம் தணிப்பதால், நாம் அவ்வளவு வீரியம் கொண்டு எண்ணய் சக்திகளுக்குகாக பன்னாட்டு சந்தையில் அவர்களுடன் போடப் போகும் போட்டியை கொஞ்சம் இது தணிக்கும். அதுவே இரண்டாம் பொறி. அப்படி என்றால், அவர்களுக்கு யாரெல்லாம் பொருளாதார எதிரியாக வர இருக்கிறார்களோ, அவர்களை இப்ப்டி எதிர் கொண்டால் என்ன? ஆங்.. இங்கு தான் இருக்கிறதைய்யா அவர்களின் மிகப்பெரிய புத்திசாலித்தனம். அதுமட்டுமில்லை, இந்த அணு ஒப்பந்தம் அவர்களின் உலக அரசியலுக்கும் எப்படி துணைப் போகும் என்று ச்ற்று பார்ப்போமா?

இது வரை அமெரிக்காவின் தன்சார்ந்த கொள்கையினால், பெரிதாக எந்த லாபமும் ஏற்பட்டுவிடவில்லை. அந்த கொள்கையால் எடுத்த முடிவுகள், ஆப்கானிஸ்தானிலோ, இல்லை பாக்கிஸ்தானிலோ (அதாவது, அதன் நியூக்ளியர் விஞ்ஞானி, ஏ கூயு கான் சம்பந்தபட்ட அணு தொழில் நுட்பம் விற்பனை கொண்ட அத்தியாயத்தில்) இராக், மற்றும் இப்பொழுது இரான், என அவர்கள் எடுத்த நடவடிக்கைகள் மற்றும் கொள்கைகளின் வெளிப்பாட்டால் அமெரிக்கா பெரிதாக எந்த பயனும் பெறவில்லை. ஆகையால் அவர்கள் தன்சார்ந்த கொள்கையை விட்டு விட்டு கூட்டு கொள்கை கடைபிடிக்க ஆயுத்தமாகிவிட்டனர். அதன் முதல் அத்தியாயமே இந்த அமெரிக்க-இந்திய நட்பு, ஒப்பந்தம். அதாவது சிறந்து விளங்கும், இந்திய மக்களாட்சிமுறை, உலக ஜனத்தொகையில் ஐந்தில் ஒரு பங்கை அடக்கிய இந்தியாவுடன் கரம் கோர்ப்பது சாலச் சிறந்தது, என்பதே அவர்களின் வெளியுறவு கொள்கையின் முக்கிய அம்சம். இந்தியாவும் உலக அரங்கில் பீறு நடைப் போட ஆய்த்தமாகிவிட்ட வேளையிலே, அதாவது 'Regional Power' என்ற தன்மையிலைருந்து விலகி 'Global power'என்ற வளர்ச்சியினை எதிர்நோக்கி நிற்கும் இந்த வேளையிலே, இந்த நட்பு, உறவு, ஒப்பந்தம், இந்தியாவிற்கு பெரிதும் கைக்கொடுக்காவிட்டாலும் (அல்லது, எப்படி என்பதை இனி வரும் ஆண்டுகளில் தான் அறியமுடியும்), அமெரிக்காவிற்கு இது ஒரு திருப்பமான கட்டம். அதாவது காலத்தின் கட்டாயம். எப்படி என்று கேளுங்கள்!

ஆப்கானத்தில், சட்டப்படியான அரசாங்கம் அமைப்பதில் மிகப்பெரிய வெற்றி ஏதும் அமெரிக்காவிற்கு கிட்டவில்லை. பாக்கிஸ்தான் இன்றும் அதற்கு இடைஞ்சலாக, தலைபானையும், அல்கெய்தாவையும் ஒரு பக்கம் வளர்த்துக்கொண்டே அமெரிக்காவிற்கு நட்புக் கரம் அடுத்த பக்கத்தில் நீட்டுகிறது. மற்றும், வளர்ந்து வரும் பாக்கிஸ்தான், சைனா உறவு அமெரிக்காவிற்கு பெரும் தலைவலி. இந்த அமெரிக்க அதிபரின் ஆப்கான் விஜயத்தில், அந்நாட்டின் அதிபர் 'ஹமீத் கர்ஷாய்' யுடன் நடந்த பேச்சு வார்த்தையில் இந்த தலைபான் மற்றும் அல்கெய்தாவின் ஆதிக்கம், பாக்கிஸ்தான் - ஆப்கான் எல்லையிலே இருந்து வருவதை பற்றி தான் பேச்சே! ஆனால் இந்தியாவின் ஈடுபாடு இதற்கு நேர் எதிர்மாறாக, குடியாட்சி அமைத்த ஆப்கானிய அரசாங்கத்திற்கு அதிக மானியம் கொடுத்து அந்த அரசாங்கம் நல்ல முறையில் நடைபெற நமது பிரதமர் வழிவகுத்து கொடுத்துவிட்டு வந்தார், சென்றமுறை அங்கு சென்றிருந்த போது.
ஆனால் பாக்கிஸ்தானோ, தான் செய்து கொடுத்த எந்த சத்தியத்தையும் நடத்திக்காட்ட வில்லை, முக்கியமாக, 9/11 சம்பவங்களுக்கும், லண்டன் பாம் சம்பவங்களுக்கு பிறகு, மதர்ஸா பள்ளிகளை மூடச்சொல்லி அமெரிக்கா வைத்த வேண்டுகோளை இன்னும் நிறைவேற்றவில்லை. அதே போல் சொல்லிக் கொள்ளும் படியாக தலைபான், மற்றும் அல்கெய்தாவின் முக்கிய தலைவர்கள் யாரையும் கைதும் செய்யவில்லை. மேற்கொண்டு மேலே கூறியது போல சைனா-பாக்கிஸ்தான் ரகசிய உறவுகள் அமெரிக்காவிற்கு பெரிதும் எரிச்சலூட்டும் ஒன்று.

இதற்கெல்லாம் பதிலடி, இந்தியாவிற்கு நேசக்கரம் நீட்டுவதுதான் என்ற அவர்களின் மாறிய வெளிஉறவு கொள்கை. அதாவது பெரும் அசுர வளர்ச்சி கண்டு வரும் சைனாவை எதிர்கொள்ள பொருளாதார முன்னேற்றம் மற்றும் தொழில்நுட்ப வளர்ச்சியில் ஆளுமை கண்டு வரும் இந்தியாவுடன் கைக் கோர்ப்பதே சாலச் சிறந்தது என்பதே, அதன் இப்போதய தாரகை மந்திரம். வளர்ந்து வரும் இந்த சக்தியை இனம் கண்டு, அதனுடன் நட்புகான என்ன ஆயுத்தம் செய்யவேண்டுமென்பதை அவர்கள் பல ஆண்டுகளுக்கு முன்னரே கணித்து விட்டனர். அதன் செயலாக்கமே இந்த ஒப்பந்தம். அதாவது 'நிகோலஸ் பர்ன்ஸ்' அரசியல் பிரிவு இணை செயலர் அவர்கள் கூறியது, ஆசியாவை தவிர, உலகத்தின் எந்த பகுதியும் முக்கியமில்லை, அதாவது அமெரிக்காவின் தொலை நேக்கு இராணுவம், பொருளாதாரம், மற்றும் அரசியல் வளர்ச்சியில் பங்கு ஏற்க. ஆக இப்படி அவர்களுக்கு பயன் தரும் இந்த ஒப்பந்தம், மற்றும் அமெரிக்க அதிபரின் இந்த சரித்திரத்தில் முக்கியம் வாய்ந்த இந்த இந்திய விஜயம், பல ஆண்டுகளாகவே திட்டமிடப்பட்டு, இப்பொழுது தான் நிறைவெறி முடிக்கப்பட்டுள்ளது. ஆக அணு உலைகளின் ஒப்பந்தம் அமெரிக்காவிற்கே அனுகூலமே!!

வல்லவனுக்கு வல்லவன்

அமெரிக்க அதிபர் ஜார்ஜ் புஷ்ஷின் இந்திய பயணத்தை ஒட்டி, இப்பொழுது வெளியாகிக் கொண்டிருக்கும் சர்ச்சைகளில் ஒன்னு, இந்த நியூக்ளியர் டீலை பத்தினது. இது என்னான்னு அதிகமா நம்ம வெகுஜன மக்களுக்கு தெரிஞ்சிருக்க வாய்ப்பில்லை. நானும் தொடர்ந்து இது பத்தி இரண்டு மூணு இடுகைகள் படிச்சி பின்னோட்டமும் போட்டேன், இந்த ஃபீல்ட்ல வேலை செஞ்ச ஆளுங்கிற முறையில கொஞ்சம், இந்த டீல்ல இருக்கிற சில சூட்சமங்களை எடுத்து விட்டிருக்கேன் கீழே படிங்க!

திடீர்னு என்னடா இந்த நியூக்ளியர் மோகம் எப்படி வந்ததுன்னா, அதுக்கு காரணம் இருக்கு! நான் ஏற்கனவே எழுதின 'வேண்டும் ஒரு புதிய ஷக்தி' பதிவு படிச்சிங்கன்னா உங்களுக்கு தெரியும். உலகத்தோட ஒட்டு மொத்த பொருளாதாரமே, பூமியிலருந்து கிடைக்கிற இந்த கச்சா எண்ணய்ய கொண்டு தான். அது அதிகமா கிடைக்கும் மத்திய கிழக்கு ஆசிய நாடுகளின் திறதன்மை ஆட்டங்கண்டதாலேயும், மேற்கொண்டு இஸ்லாமிய நாடுகள்ல உண்டான தீவிரவாத தன்மையும் ஒரு காரணம். அதனால வளர்ந்த நாடுகளான அமெரிக்கா, பிரிட்டன், பிரான்ஸ், மற்றும் ஜப்பான் போன்ற நாடுகள், ஏற்கனவே இந்த நியூக்ளியர் தொழில்நுட்பத்தை பயன்படுத்தி வந்தாலும், சில பெரிய அணு உலை விபத்துக்கள் மற்றும் அதவிட மலிவா கிடைக்கும் கச்சா எண்ணைய் கிடைச்சதாலே, அதில அவ்வளவு கவனம் செலுத்தில. இன்னொன்னு, அதற்கு உண்டான முதலீடு ரொம்ப ஜாஸ்தி. அடுத்தது, கச்சா எண்ணைய் மற்றும் எரிவாயு பேன்றவற்றில் எந்த வில்லங்கமும் இல்லை. ஏன்னா எரிஞ்சு தீர்ந்திடும். ஆனா நியூக்ளியர் அப்படி இல்ல, எரிஞ்சோனதான் அதோட வேலையே, 'நியூக்ளியர் பாம்' செஞ்சுப்புடலாம்ங்கிறதுனால, எல்லா நாடுகள்யும் போய் சுலபமா மூலதனம் போட்டுத் தொடங்கிடமுடியாது. அதுக்கு தடை உண்டு, அப்புறம் எல்லாருமே கைய முறுக்கிக்கிட்டு 'டேய் டூய்'ன்னு 'எங்கிட்ட நியூக்ளியர் பாம் இருக்குன்னு' உதார் விட்டுக்கிட்டு இருப்பாங்க எல்லாரும். ஆகையால், இதற்கு பெரும்பாலும் முதலீடு செய்வது அந்தந்த அரசாங்கங்களே! நம்ம நாட்டிலேயும் இந்த நிறுவனம் அரசாங்கத்தின் கீழ் செயல்படும் நிறுவனம்.

இந்தியாவில இந்த நியூக்ளியர் வளர்ச்சிக்கு உறுதுணையா இருந்தவர் 'ஹோமி பாபா'. ஒரு அம்பது வருஷத்துக்கு முன்னே அவரு வடிவமைச்ச திட்டம் தான் மூணு அடுக்கு திட்டம். அந்த திட்டம் என்னான்னு சொல்றதுக்கு முன்னே, இந்த நியூக்ளியர் மின்னனு ஆலை எப்படி செயல்படும்னு சொல்றேன். அதாவது யுரேனியங்கிற ஒரு வஸ்துவை, அதன் அணுக்களை பிளந்தா, வெளிப்படக்கூடிய வெப்ப சக்திய உபயோகிச்சு தண்ணிய கொதிக்க வச்சு, அதிலருந்து வர நீராவியை பெரிய டர்பைன்கள சுழல செஞ்சு அதோட மின்சாரம் உற்பத்தி பண்ற ஜெனேரட்டரை இணைச்சு சுழல செஞ்சு மின்சாரம் உற்பத்தி பண்றது தான் இந்த நியூக்ளியர் பிளான்ட்டோட வேலை. நம்ம மெட்ராஸ் பக்கத்தில இருக்கிற கல்பாக்கம் யாரும் போயிருந்தா அங்க அந்த அணு உலை டூம்மை நீங்க பார்க்கலாம். அப்ப்டி எரிச்ச யுரேனியத்திலருந்து வெளிவரும் புளுட்டோனியம்ங்கிற இன்னொரு வஸ்துதான் பாம் செய்யக்கூடிய பொருள். நான் முன்ன சொன்னமாதிரி எரிச்சு முடிஞ்சு தான் வில்லங்கமே! ஆனா, நான் சொன்ன மாதிரி அவ்வளவு ஈசியா இந்த யுரேனியத்தை பிளந்திட முடியாது. இயற்கையா கிடைச்ச யுரேனியத்தை கொஞ்சம் போல அணுபிளக்க கூடிய பலமான யுரேனியமா மாத்தனும். அதுக்கு பேரு ஆங்கிலத்தில 'Enriched Uranium'. இப்படி பலமான யுரேனியமா மாத்த உண்டான தொழில்நுட்பம் அவ்வளவு ஈசியா கிடைச்சிடாது. ஏன்னா, இந்த பலமான யுரேனியத்தை வச்சு பாம்மு பண்ணிபுடலாம். அதனால, இந்த தொழில்நுட்பம் தெரிந்த நாடுகள் அமெரிக்கா, பிரான்ஸ், பிரிட்டன் எல்லாம் ஒன்னுக்கூடி வளராத நாடுகளை தங்க பார்வையில வச்சுக்கினும்னு ஒரு மசோதா கொண்டு வந்தாங்க, அது தான் 'NPT'ன்னு படிச்சிருப்பீங்க, அந்த விவரத்துகெல்லாம் நான் போகலை இப்ப! அதில கையப்பம் இட்டா உங்களுக்கு அந்த தொழில்நுட்பம் உண்டு. நாம அதில கை எழுத்து போட்டா அவங்களுக்கு அடிமை, அதனால,

நம்ம பாபா என்ன பண்ணுனார்னா, இந்த பலமான யுரேனியம் இல்லாம அணுமின்நிலையம் கட்டமுடியாதான்னு யோசிச்சப்ப, கனடா நாட்டுக்காரங்கட்ட இயற்கையான யுரேனியத்தை உபயோகிச்சு கட்டன அணு ஆலை தெரியவந்து, அவங்களோட ஒப்பந்தம் போட்டு, ராஜஸ்த்தான்ல ஒரு அணுமின்நிலையம் கட்டினாங்க, அவங்க துணையோட. அதுக்கு முன்ன இந்த பலமான யுரேனியத்தை உபயோகிச்சு கட்டின அணுமின்நிலையம் தாரப்பூர்ல, அமரிக்காவின் தொழில்நுட்பத்தில கட்டினது. அதுக்குள்ள 1974 ல நம்ம அணுகுண்டு வெடிக்க போயி, கனடா, அமெரிக்கா, எல்லாரும் அம்போன்னு நம்பல விட்டுட்டு ஓடிட்டாங்க. அப்புறம் இங்க , அங்க கையேந்தி இந்த மின்நிலையத்தை ஓட்டினோம். அப்படி தொடர்ந்து ஓட்டுனும்னா, International Atomic Energy Agency (IAEA)ங்கிற நிறுவனத்தின் மேற்பார்வையில இந்த அணு ஆலைகள் எல்லாம் கண்கானிக்கப்பட்டு ஓட்டப்படனும். பிறகு முட்டி மோதி நம்மலா தொழில்நுட்ப வளர்ச்சியை பெருக்கி, நிறையா அணு உலைகளை கட்டிட்டோம். அந்த அணு உலை எல்லாம் 'IAEA'கீழே கண்காணிப்பில இல்ல.

அப்புறம் பாபாவின் மூணு அடுக்கு திட்டத்தில முதல இயற்கையான் யுரேனியத்தை உபயோகிக்கிறது, இரண்டாவது கட்டமா, அது வெந்த உலையிலயிருந்து கிடைக்கும் புளுட்டோனியத்தையும் யுரேனியத்தையும் கலந்து 'Fast Breeder Reactor'ன்னு இன்னொரு மாதிரி அணு உலை கட்டறது. பிறகு மூணாவதா, நம்ம நாட்ல அளவுக்கு அதிகமா 'தோரியம்'னு ஒரு வஸ்து கிடைக்கிது, அது அப்படியே 'decay' ஆனா 'U233, அதாவது யுரேனியமாயிடும், பிறகு அதை அணு உலையில உபயோகிக்கலாமும்னு மூணாவது கட்ட திட்டம். இந்த தோரியத்தில செஞ்சது தான் 'லாந்தர்', அதாவது பெட்ரோமாஸ் லைட்டுன்னு கேள்விபட்டிருக்கிங்களா, அதில வெள்ளையா ஒன்னு, பம்பு பண்ணோன்ன சும்மா 'பளிச்'னு எரியும் பாருங்க, அதை செஞ்சிக்கிட்டு இருந்தாங்க முன்னெல்லாம், இந்த தோரியத்தோட அருமை தெரியற வரைக்கும். நம்ம கேரளா, திருநெல்வேலி, கன்னியாக்குமரி கடற்கரை மணல்ல இருந்து எடுக்கபடுவது. நம்ம நாட்ல உலகத்தில இருக்கிற ரிசர்வ்ல்ல முப்பது சதவீதம் இருக்கு, தெரியமா? இதெல்லாம் தெரிஞ்சு திட்டம் போட்டு, ஆராய்ச்சி பண்ணி இப்ப நம்ம இதை உபயேகிக்க முதலிடத்தில இருக்கிறோம். வேணும்னா இந்த ரிப்போர்ட்ட படிச்சு பாருங்க, சுட்டி இதோ. இதல்லாம் தெரிஞ்சு வராரு அய்யா இப்ப அமெரிக்கா நம்மகிட்ட, டீல் பண்ண! என்னான்னு விவரம் கேளுங்க சொல்றேன்.

1999ல திருப்பி அணுகுண்டு வெடிச்சோன, நமக்கு 'சூப்பர் கம்ப்யூட்டர்லருந்து எந்த தொழில்நுட்பமும் கிடைக்காது போ'ன்னு துரத்திவிட்டவரு, இப்ப என்ன சொல்றாருன்னா, நான் உனக்கு உதவுரேன், உன்னுடய ஆக்க பூர்வமான அணு உபயோகத்துக்குன்னு! ஆனா சில கண்டிஷன், அத நீ கேட்டகணும் அப்படின்னு. அங்க தான் வில்லங்கமே! போன ஜீலையில நம்ம பிரதமர் வாஷிங்க்டன் வந்தப்ப ஒரு அக்ரிமென்ட்ல கை எழுத்து போட்டுட்டு போனார். அதாவது நம்ம கிட்ட இருக்கிற நியூக்ளியர் சொத்தை ரெண்டா பிரிக்கிறது. அதாவது ஆக்கபூர்வமா மின்சாரம் தயாரிக்கிற வசதிகள், இன்னொன்னு மிலிட்ரிக்கு தேவையான பாம் செய்யக்கூடிய வசதிகள். அப்படி ஆக்கபூர்வமா மின்சாரம் தயாரிக்கிற வசதிகளை உலகநாடுகள் நிறுவனம் IAEA மூலமா கண்காணிக்கப்படும். அப்படி என் கண்கானிப்பில இருந்தின்னா, நீ கேட்கிற தொழில்நுட்பமெல்லாம் நான் தரேன்னு. அப்படி பிரிக்கிறதல தான் இப்ப வில்லங்கமே. நம்ம நியூக்ளியர் விஞ்ஞானிங்க என்ன சொல்றாங்கன்னா, அமெரிக்கா போட்டு கொடுத்த லிஸ்ட் படி எல்லா வசிதியும் சேர்க்க கூடாது, நம்ம 'Fast breeder reactor', நம்ம முயற்சில கண்டுபிடிச்ச வசதியை முக்கியமா சேர்க்க கூடாது, ஏன்னா அவங்க கண்காணிப்புல நாம இருந்தோமுன்னா, நம்ம மூணு அடுக்கு திட்டத்துக்கு அமெரிக்கா இடையூரு விளைவிக்கும். அப்புறம் நம்ம தனி சக்தியா வளர்றது அம்பேல்ன்னு!

வாஸ்த்தவமான பேச்சு! இப்ப நம்ம வளர்ந்து வரது அவங்களுக்கு கொஞ்சம் காய்ச்சலாதான் இருக்கு. ஏற்கனவே, பொழுதென்னைக்கும், இந்தியா, சைனான்னு தான் பேச்சே! ஏன்னா நம்ம பொருளாதார வளர்ச்சி அவங்களை அசர வைக்கிது. இன்னொன்னு தெரியுமா, நம்ம உலகத்தில சொத்து வாங்குனும்னா, இவங்களை கேட்டுத்தான் வாங்கனுமா? இது எப்படி? இப்ப தற்சமயம் இந்தியா சிரியா நாட்ல இருந்து 'Oil and Gas' சொத்து வாங்க போனப்ப ஒரே கூச்சல் போட்டு, ரகளை வுட்டுடாங்க இந்த அமெரிக்காவினர்! அதே மாதிரி ஏகப்பட்ட மிரட்டல். நான் சொன்னமாதிரி கை எழுத்து போடலைன்னா, அப்புறம் நடக்கிறதே வேறே, நம்ம உறவு அவ்வளவு நல்லா இருக்காதுன்னு ஏகபட்ட பூச்சு காமிச்சிகிட்டு இருக்காங்க!

இன்னொன்னு என்னா தெரியுமா, சமீபமா, அமெரிக்கா செனட்ல ஒரு பில்லு பாஸ் பண்ணுனாங்க, அது என்னான்னா, அமெரிக்காவை காப்பதே-கல்வி, ஆராய்ச்சி (Education and Research), அப்புறம் சக்தி (Energy), பிறவு நிதி(Finance), இந்த மூணுலேயும் அமெரிக்காவை காப்பதே! அதாவது, அதுக்கு பேரு 'PACE' (Protest America's Competitive Edge)ன்னு. இப்ப சொல்லுங்க, இதே மாதிரி நம்மலும் ஒரு பில்லு பாஸ் பண்ணுவோம், நம்முடய விருப்பு வெறுப்புகளை பாதுகாக்க! எதுக்காக சொல்றேன்னா, அவங்களை எதிர்த்து வாய்ஸ் கொடுத்த வாஜ்பாய்ய, மறுத்து அறிக்கை விட வச்சுருக்காரு அமெரிக்க தூதர் மில்ஃபோர்ட், அப்புறம் மகாராணி கண்ட்லேசா, என்னா மிரட்டு மிரட்டுறாங்க தெரியுமா, ஆக குரல் கொடு, நாமும் வல்லமை படைத்த சக்தின்னு.

வல்லவனுக்கு வல்லவன்!

வேண்டும் இனி ஒரு புதிய ஷக்தி!

சென்ற பிப்ரவரி, 21ம் தேதி, திங்கள் கிழமை, குடியரசு தலைவர் தினமாக அமெரிக்காவில் கொண்டாடப்பட்டது, அந்நாள், அமெரிக்க அதிபர், புதியதொரு முழக்கமிட்டார். அது 'வேண்டும் இனி ஒரு புதிய ஷக்தி!' அது என்னான்னு பெரும்பாலான நம்ம தமிழ்ஜனங்களுக்கு தெரியுமா? அப்ப அப்ப சினிமா, வெட்டியா பொழுது போக்கும் மத்த சமாச்சரங்களை படித்து நாட்போக்கும் என் இன மக்களே, இதெயும் கொஞ்சம் படிங்க!

இது வரைக்கும் அமெரிக்காவின் மிகப்பெரிய பொருளாதார ஷக்தியில பெரும் பங்கு வாய்க்கிறது, அது செலவிடும் எரிபொருள் தான். அதாவது கச்சா எண்ணையிலருந்து வர பெட்ரோலிய பதார்த்தங்கள்.
அமெரிக்கா உபயோகிக்கும் இந்த வஸ்து, 75 சதவீதம், இது அத்தனையும் மத்திய கிழக்கு ஆசிய நாடுகள்ல இருந்து வர்து தான். ஆனா அந்த நாடுகள்ல மாறி வரும் அரசியல் நிலை, மற்றும் தீவிரவாதங்கள் சூழந்த அந்த பகுதி, அமெரிக்காவை பெரும் பகை நாடா நினப்பத்தால, தடங்கல் இல்லாமல் இனி தொடர்ந்து, இந்த எரிபொருள் ஷக்தி கிடைக்குமாங்கிறது இனி சந்தேகம் தான். அவங்கலை நம்பி இனி வாழமுடியாது, மேற்கொண்டு இந்த கச்சா எண்ணையை அதிகம் நம்பி, அந்த கிழக்கு ஆசிய நாடுகள் அரசியல் பிளாக்மெயில்லருந்து தப்பணும், அதே சமயத்தில அவங்க வாழும் ஆடம்பர வாழ்க்கை நிலையில தடுமாற்றம் உண்டாகம இருக்க, வேற வழிவகுக்கும், இந்த நிலையை மாற்ற என்ன வழின்னு யோசிச்சப்பதான் இந்த முழக்கம்!

அதாவது மாற்று ஷக்தி என்னென்ன உண்டோ, அதில இனி நம்ம ஷக்தி எல்லாம் செலவழிச்சு, புதிய ஷக்திகளை கண்டுபிடிக்க வழி செய்வது! இதற்காக அமெரிக்க அரசாங்கம் இன்னும் 22 சதவீதம் அதிகம் செலவழிக்க முனைப்பா இருக்கு. ஏற்கனவே அது 10 பில்லியன் டாலர்களை 2001லிருந்து செலவழிச்சிக்கிட்டு இருக்கு. மேற்கொண்டு, உலக மாசு கட்டுப்பாடு கொண்ட, இப்பொழுது கிடைக்கும் எண்ணைய் எரிபொருளுக்கு சமமா இருக்கக்குடிய, ஷக்தியை கண்டுபிடிக்க உண்டான ஆராய்ச்சியை முடிக்கிவுட்டுடிச்சு.

ஏற்கனவே இந்த 'Global warm' ங்கால, என்ன ஆயிகிட்டு இருக்குதுன்னு உங்களுக்குத் தெரியுமா? சமீபத்தில 'Greenland' என்கிற தேசத்தில உள்ள பனிக்கட்டிகள் (glacier) எல்லாம் அளவுக்கு அதிகமா உருகுதுன்னு கண்டுபிடிச்சிருக்காங்க! இந்த நிலை தொடர்ந்தா, கடல் மட்டம் இன்னும் 100 வருஷத்தில ஒரு 7 மீட்டர் உயர்ந்து, கடல்மட்டத்துக்கு தாழ்வா இருக்குற நகரங்கள் எல்லாம் கடலுக்குள்ள போயிடும் தெரியுங்களா. இதுல்ல எந்த ஊர் எல்லாம் உள்ள போகப்போவுதுன்னு தெரியுமா? ஹாலந்து நாட்ல உள்ள ரொட்டர்டாம்லிருந்து, நியூஆர்லென்ஸ், லண்டன், பங்களாதேஷ் கடலோர பகுதிகள், ஏன் நம்ம சென்னையும் கடலுக்குள்ள போயிடும் போங்க!(இவங்க எல்லாம் ஏன் தான் இந்த மாதிரி விஷயங்கள்ல எல்லாம் கவலைப் படறாங்களோ! நம்ல பாருங்க குஷ்புக்கும், சுஹாசினிக்கும் வெளக்கமாத்த காமிக்கவே நேரம் சரியா போவுது, இதில கழுதை, இதப்பத்தி என்னத்த யோசிக்கிறது!)

அதனால என்னென்ன வழிமுறைகள்ல அவங்க மாற்று ஷக்தி தேட முனைஞ்சிருக்காங்க தெரியுமா?

மாற்று வழி - வீடுகள் மற்றும் வியாபரத்துக்கு!
சுத்தமான நிலக்கரி தொழில்நுட்பத்திலயும், சுத்தமான, பாதுகாப்பான அணுஷக்தியிலயும், சூரிய ஒளியில் கிடைக்கும் ஷக்தியும், மற்றும் காற்றாலைகள் இருந்து வரக்கூடிய ஷக்தியிலயும் துரித ஆராய்ச்சி பண்ணி அதிலருந்து வெளிப்படும் ஷக்தியை கச்சா எண்ணெயிலிருந்து கிடைக்கும் ஷக்திக்கு மாற்றாக கொண்டு வருவது. இதுக்காக அவெங்க செலவழிக்க போவது கொஞ்சம் நஞ்சமில்ல, பல பில்லியன் டாலர்கள்!

மாற்று வழி - வாகனங்களுக்கு!
இங்க இனி ஒடப்போகும் கார்கள், வாகனங்கள் எல்லாம் இப்ப உபயோகத்தில இருக்கிற பெட்ரோல், டீசல் விட்டுட்டு "Cellulosic Ethanol" ங்கிற ஒரு புது எரிபொருள்ல ஓட்ட வைக்க போறாங்க.
அப்புறம் பெட்ரோல்யும், அதிகம் உழைக்ககூடிய பேட்டரியலயும் மற்றும் ஹைட்ரஜன்லயும் ஓடப்போற "Hybrid" கார் வரப்போகுது! இதற்காகவும் பல கோடி டாலர்கள் செலவிட தயாரகிட்டாங்க( ஏற்கனவே "Hybrid" காருங்க இங்க நிறைய ஓடிகிட்டு இருக்கு, அந்த மாதிரி காரு வாங்கினா, வரிகள் எல்லாம் கம்மிபண்னி, மக்களை அரசாங்கம் இந்த மாதிரி காருங்களை உபயோகிக்க ஊக்கவிக்கிறாங்க!)

ஆக அடுத்த 20 வருஷத்தில, அதாவது 2025ல இந்த 75 சதவீத எண்ணய் இறக்குமதிய சுத்தமா நிறுத்தி, மாற்றிய ஷக்திகள்ல வாழ்க்கையை அமைக்கப்போறாங்க. பார்த்தீங்களா, எப்படி தொலைநோக்குப் பார்வையோட திட்டமிட்டு வேலைசெய்றாங்கன்னு. இந்த பிரகடனத்தை வாசிச்ச புஷ்ஷை டிவியில பார்க்க எவ்வளவு நல்லா இருந்திச்சு தெரியுங்களா! நம்ம அரசியல் தலைவர்கள் நம்ம நாட்டு பிரச்சினைகளை வழி வச்சி ஏன் இப்படி தொலைநோக்கு பார்வையில மக்களை வழி நடத்த மாட்டேங்கிறாங்க?

தமிழக மக்களே, இதோ, மறுபடியும் எலெக்ஷன் வருது, 'போடுங்கம்மா ஓட்டு இரட்டை எலையை பாத்து, இல்ல உதயசூரியனைப்பாத்து, இல்ல மாங்காயோ, தேங்காயோ, புளியங்காயோ பாத்து போடுங்கம்மா ஓட்டு! யாரு நல்ல பாட்டு பாடறன்னும் பாத்து ஓட்டு போடுங்க!